Hnam boral loh nan


Ram danga awm Mizo, Zohnahthlak te hi a chawhruala  chhut chuan hnam dang nei hi mipa aiin hmeichhiaah an tam zawk a. Hnam dang Chinese, Vai, Janpanese, adt te hi keini aia ram dangah lo awm hmasa daih tawh leh mi tam tak lo awm tawh an ni nain, keiniho nen a inkhaikhin hian hnamdang nupui, pasal nei hi a % zawng chuan an tam vak lovin ka hria. A bik takin Chinese-ho phei hi chu an mahni mi leh sa hi an in nei tang tang a, an tawng te pawh new generation ho an thiam tir deuh zel hi an fakawm hle.

Ram dangah kan awmin hnambo kan nih loh nan mahni mi leh sa ngei neih tumna rilru kan neih hi a pawimawh a. Kan fate mahni tawng thiam ngei tura zirtir pawh nu leh pate mawhphurna liau liau a ni. Hnamdang neih leh neih loh hi a mimal zawngin tumah inkhap theih leh lo sawi ve vak vak theihna kan nei lem lova. Nula thenkhat chuan ram danga awm chuan mahni mi leh sate ngainep a, hnamdang a bikin Sap ngaisang tlat te kan awm a, chutiang rilru kan put chuan mahni hnam ngainep leh hnam bova in hnuh lutna a ni. Mi an awmna hmunin a zir loh chuan mahni mi leh sa awm vak lohnaah chuan hnam dang nen an lo inngainain an lo inhmangaih thei a chutiang a innei ta pawh tam tak an awm a, chung chu keini lo sawi phak a awm lova, kan community pawn lo sawisel vak vak ang chi te hi thil tha a ni lova, community-ah tlangnel tur leh nuam ti taka an tel zelna turin kan tanpui a ngai zawk a ni. Kan en dan kan tih danglam vak a, kan sawisel chuan kan mi leh sate chu hnam bo turah kan nawr liam tihna a ni. Tin hnam dang neite pawn hnam dang neih vanga inla hrang mai lovin hnam dang neih vanga culture sock harsatna hrang hrang kan tawh te kan mi leh sate tan kawng inkawh hmuh leh tawnhriat inhrilh hi a thain ka hria. Hnamdang neih tawh tawh chuan kan fate Mizo thisen an kaina a taka a lan theihna awm chhun chu an hmingah leh kan tawng an thiam leh thiam lohah a ni a. An hming chu Mizo hming kan lo phuah lo a nih pawn kan tawng hi thiam ngei turin mahni inchhungah chuan mahni tawng hlirin be ta ila chuan an thiam ngeiin a rinawm, chuchuan kan hnam nihna a la chhawm tir zel dawn a ni.

Mizo, Zohnahthlakte hi mi tlemte chauh kan la nih vangin inhumhalh ngai kan ni a, mi thenkhat chu chimralin kan awm mek a, hnam rilru pu a kan inhumhalh a ngai tak meuh meuh a ni. Mizo danah chuan hnam kan lak dan hi mipa lam a nih vangin hmeichhiain hnamdang pasal a neih chuan an fate chu hnamdang an lo ni a, mipa chuan hnamdang nei mahse, an fate chu Mizo an la ni tho a. Mahse, hmeichhia pawn hnamdang nei mahse, an hmingah Mizo hming an tawng pawh Mizo tawng a tawng tir theih chuan Mizo nihna chu an la chhawm nung zelah kei chuan ka ngai tho.

Mizo nu leh pa atanga piang fate Hming kan phuahin eng vang nge Sap hming kan phuah kher a? Mizo tawng kan nei a hming phuah dan pawh chi hrang hrang kan nei a, tawng nei lo, hming phuah tur nei ve lo ang mai a, hnamdang Sap hming kan fate hmingah kan phuah hi hnam boralna a ni. Bible hming kan inphuah pawh hi mahni hnam hming kan phuah tel loh chuan Bible-a hming te hi khawvel hmun hrang hranga hnam tam takin hming an pu ve si a hming atang hian kan hnam nihna a hriat theih thin lo va, Mizo hming pawh phuah tel ngei thei ila a tha. A theih chuan mahni tawng ngei a kan fate hming phuah hi a tha ber, Kristian kan nihna pawh mahni tawng ngeiin kan hmingah kan phuah thei a, Bible a mi a chhan pawh kan hriat hlei loh hming te kan inphuah mai mai hi kan dawn chiang lo a ni. Tin, ram danga awm chuan “LAST NAME OR SURE NAME”, kan neih a ngai a, hei hi mi tam tak chuan kan nei ve lo emaw kan ti thina, kan chi, chipeng leh kuang (Entir nan: Fanai, Pachuau, Chawngthu, Chhangte,adt) te hi kan sure name dik tak a ni a, ngaihtuah buai ngai lova hman mai tur a ni. Kan sure name/last name, chi,chipeng leh kuang kan ziah lan pawh hi kan hnam nihna vawngtu a ni a, amaherawh chu, a chibing zawnga inteltual a inlakhran nan erawh hman loh a tha.

Sap or tawng dang tawng hmanna ramah awm chhungkaw tan chuan an fate lo piangate chu an duh emaw duh lo emaw Sap tawng or tawng dang an thiam ngei ngei dawn a, mahni inchhungah chuan Mizo tawng a biak hi a pawimawh hle. Mithenkhat chu an fate, an tute Sap tawnga an tawng kha an lawm a Mizo tawng a be tawh lovin Sap tawngin an bia a, hnam bo nihnaah an hnuk lut mek tih erawh an inhre hauh lo.

Burma rama hnam lo awm hmasa Pyu-ho pawh mahni tawnga ziak leh chhiar nei nimah se, Kawl(Bama)ho nen a inneih pawlhin chimralin an awm a, tunah chuan Pyu hnam hmuh tur pawh an awm tawh lo a ni. Kalay & Kabaw vel a cheng Shan-ho pawh tunhmain lal ram ropui tak nei nimah se, mahni hnam tawng hmang an awm tawh lova, an hnam hming a hming sa an awm tawh lova, Kawl(Bama)ho nen an inneih pawlhin, mahni culture, mahni tawng, mahni thuam te chu an kal san tak a vangin Kawl(Bama)ah an lo chang zo ta a. An khaw hming Khampat, Nanchisawng, Nansawpuh, Nanzilung,adt tih vel bak lo chu Shan nihna a lan theihna a awm tawh lo a ni. Tin, hetah Shan-ho kan sawi hi, Kawl(Bama)ho hian neih pawlh a, chimral hi an tuma, a duh a piang chu Bama-ah an ziak lut a. Chutiang zel chuan Burma ram hnam tam tak pawh Kawl-ho hian an mahni Bama-ah ziak lutin an hnamah a dah tam tak an awm a. Chung Kawl(Bama) tak tak ni lote pawh  chu,”Nang kha Kawl(Bama) tak tak pawh i ni lo, chuti khati” tih zawng a, inhmusitna leh inenhranna an nei ve lova, chuvang chuan Kawl(Bama) nihnaah khan an lungawi a, an thangthar lo kal zelte chuan Kawl tak takah an inngai a, an thlahtute hnam pawh an hre tawh lova Kawl nihnaah chuan an nghet ta bur thin a ni. Chutiang avang chuan Burma-ah chuan Kawl-ho hnam lian ber an ni ta reng a ni. Keini zingah pawh chutiang rilru kan put chu a tul a ni, Mizo danah hnam dang pawh Mizovaah sa an phun  chuan Mizo an lo ni mai thei a, mahse keimahni hi kan rilru a te a, itsikna te kan nei lian a Mizova lungawi taka awm tawh pawh”Mizo tak tak i ni lo, Mizo-2, Mizo-3 i ni hnam chawm thlahpawlh Mizo dik tak i ni lo.”, tih ang chi zawnga rilrupu leh tawngkhum mai mai ching kan la tam a, heivang hian Mizo-a insuihkhawmna pawh a tidarha,kan pun tur ang pawn kan pung thei lo a ni.

Mizo, Zohnahthlakte hian tawng peng chi hrang hrang kan nei a, thuam chi hrang hrang kan nei bawk a hengte hi kan hnam hausakna a ni a. Kan nihna a lanchhuah theihna chu kan tawngah te, kan thuamah te, kan hmingah te leh nunphung(culture)ah te a ni a, khawi ramah pawh awm ila i chhawm nung zel ang u.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in article and tagged . Bookmark the permalink.

8 Responses to Hnam boral loh nan

  1. He post chu hnam tana thahnemngaih bakah a ngaihtuahna a zau tha khawp mai.

  2. Khawl Thang Vuta says:

    Chhiar chu chhiar nge nge a lo ni e.
    A bengvar thlak hle a. Mi tam zawkten chhiar ve ngei se’ tih hi ka duhthusam a ni.

  3. Vohbikipa says:

    Tha hle mai! I thahnemngaihna hi a ropui bawk a, ziak tha bawk. Kei tun lai ka phak tawka ka lo vei ve a nia. Amarawhchu, Globalization in a ken tel inpawh tawnna leh in chiahpiahna hian nasa tak chu effect a nei mek a, kan hlawkpui laiin kan tuar ve zel bawk a. Nasa zawka in hrilh mawlh mawlh a ngai a nih hi! Bei zel rawh khai!

    • zochepa says:

      Ka thu ziak min hlut sak a ka lawm e, thu ziah zawh ting tang lo a ka dah hi a awm nual a, rilru kal ding deuh lai lo chuan lehkha ziah pawh hi a har fu.

  4. Vohbikipa says:

    chhawmdawl tu i mamawh tawh a niang 😀

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s