Ei Siam Lam


Note: He article hi Chhinlung Magazine 2012-2013, Bangalore Mizote buansaih tan a ka ziah a nia, a chhuahna a rei ve tawh bawk a, Chhinlung magazine chhiar tur nei lo tan tangkaipui tawk mial an lo awm takin ka post a ni.

Thuhma

Mizote hi ei siam lamah hian hnam dang aiin kan hnufualin ei siam dan kan nei tlem hle a, kan awmna hmunin a zir loh vang te pawh a ni ang. Nitin ei lovin kan awm thei si lova ei siam hi nitin kan nunah thil pawimawh berte zing a mi a ni. Khawvel hmun hran hranah Mizote pawh kan darh ve ta nuk mai a, hnam dang ei leh in ei nachang leh siam nachang pawh kan hre ve zel a, ei siam lamah pawh nasa takin hma kan sawn a, a hmanrua leh a bawlhlo te lei nan pawh sum kan seng ve tan ta a, hmasawnna tha tak a ni. Ei siam hi mitin tan a pawimawh veka, awlsam zawk, hrisel zawk, tui zawk leh eizawnna tlaka kan siam theina turin a tlangpui tar lan kan tum dawn a nia.

1.Ei siam thiam turin:

(a)Inchhungkhurah

Kan hnam ei leh in siam dante hi zirna run hmasaber inchhungkhur atang nu leh pate hian kan fate a hmei a pain kan zirtir hi a tul a, chu chu nu leh pate mawhphurhna a ni. Kan fate kan duat kan ti a, engmah ti lovin kan dah a eirawngbawl leh thil dang zawng zawng pawh awmpuite kan tih tir vek a, an zirna run hmasaber a an zir tur zirtir lovin awmpuite tihtir vek hi kan fate kan awmpuite aia tlaw zawkah kan siam tihna a ni a, engtinnge ei siam lam an thiam theih ang? Ei siam thiam tur chuan  a bul tanna chu inchhungkhur a ni a, inchhungkhura kan zir thiam ei siam dan hian thil dang ei siam dan zir lehna tur kha a ti awlsamin a kawnghmang man thiam a ti awl a ni. Inchhungkhura eirawng bawl ngai miah lo leh nitin inchhungkhur eirawng bawl thin hi ei siam dan zir tlang se, eirawng bawl ngai lo tan chuan a let enge maw zatin harsatna a tawk dawn a ni.

(b) Chik taka ei

Kan ei ngai loh ei leh in kan ei kan inin ei liam mai mai lovin chik takin ei ila, eng nge an pawlh, eng rim nge nam, eng hian nge tituitu, adt.. tih ang chi zawng zawng kha chik taka hriat tum a tha. Ei kan siam reng rengin kan thil siam kha chik taka tem chhin tur a ni a, a al lam, hang lam, a thur lam, a thak lam, a tawk em? tih kha hre ngei turin kan tem chhin ang a, a pawlh belh ngai chu pawlh belh tur a ni.

(c) Rilru pek

Thil engkim tihah rilru pek a tul ang bawkin ei siam thiam tur pawh hian rilru pek a ngai a ni. Naktuk zingah i bazar anga eirawng i bawl dawn a, bazar thlen hnuah lei tur leh siam tur ngaihtuah chawp ai chuan zan i mut lai khan; i thil siam tur leh a siam dan tur kha ngaituah lawk la, chutatang chuan i thil lei tur chu a lo lang nghal mai ang a. Zing i bazar hunah chuan zana i ngaituah lawksa angin lei tur ang ang chu lei a haw nghal a eirawng i bawl nghal zung zung mai dawn a ni. Chutianga rilru pe taka kan ei siam tur ngaihtuah lawk a eirawngbawl chuan bazar hun chhung pawh a rei lo va, ei siam chhung pawh a rei lova, ngaihtuah lawka ei siam chu a tui pawh a tui duh bik a ni.

(d) Phur takin duhsakna nen

Kan nu te, kan pi te an chawhmeh siam ram dang khaw danga kan awm hnuin kan ei chak lehin kan ngai em em thin a, eng vang nge? Kan nu te leh kan pi te chuan an tu leh fate tan duhsakna nen chhungkaw tan ei an siam a, an hmangaih an chhungte tan chuan phur takin eirawng an bawl thin a, atui lo palh ang tih hlau reng rengin ei an siam thin vangin an ei siam te chu a tui em em thin a ni. Phur lo taka thil tih reng reng engmah a fuh thei lova, duhsakna tel lova thil intih sak pawh a fuh tak tak thei lo angin ei siam lamah pawh, i ei siam sakate chungah duhsakna nen phur taka i siam chu; i thil siam chu a ma tawkah a tui em em ang. “Ei leh in siam thiam chuan mi duhsakna an ngah a ni” an tih thin kha.

2. Himna(safety)

Thil tih dawnin inhliam leh chetsual awm lova him tak thil tih hi a pawimawh berte zing a mi a ni a, ei siam lamah phei chuan inhliam leh chetsual mai bakah ei sual a awm theih a vangin fimkhur leh zual a ngai a ni. Kan fimkhur dan turte a tlangpui tar lang i la.

(a) Chettlatna hmun

Ei siama kan chettlatna hmun chu a tlangpuiin choka a ni thin a, choka chhuat a nal em, inchhuih palh theih thil a awm em, a tawp lutuk em, sazu leh rannung(tho,chukchu,adt) a lut thei em? adt..tih zawng zawng ang chi kha a hmasa bera endik tur a ni a. Tihfai ngai kan tifai anga, inchhuih palh thei awm kan dah tha anga, sazu leh rannung an luh theih chuan lut thei lo tura siam dan a awm chuan siam nghal, sazu leh rannung dan sen a nih loh chuan eiin leh bungbel sazu leh runnung khawih theih lotura dah that vek tur a ni.  Sazu leh rannungte hian natna hrik an paia, kan ei siam tur, bungbel leh hmanruaiah an lo chettlat chuan  natna hrik pai chu kan ei siamah a lo tel ang a, kan thil siam eitute natna a thlen theih a vangin; kan fimkhur hle a ngai.

(b) Bungbel leh hmanrua

Bungbel chhe tawh lam hman avanga chetsual leh inhliam theih thil a tam a, bel a dawmna tha lo, thirbel a dawmna tha lo te avangin kan ei siam sa tih buak emaw a sain min kang emaw a awm thei a, bungbel kan hman te chu a siam theih siam a a thlak ngai thlak tur a ni. Fianpui a fawng tha lo vangin a sat laiin a thirah kan va dawm ang, kan kut a kang thei a, a fawng nei chi chu a fawng vuah a vuah theih loh  a nih chuan a thar lei mai tur.

Hmanrua hi a pawihmawh hle a ei siamna chi hmanrua chi hrang hrang a awm a, kan tana tangkai ang tur chu neih ngei ngei a tha. Hmanrua remchang taka hman hi chuan a awlsamin hun a heh lo bakah a him pawh a him duh a ni. Ei siamnaa chem nena inhliam tam zawk hi an chem bil vang a ni a, chem bil tak nen a thil chan/zai/sah chu kan tan a ngai a; tang tak chung chuan a lo bung/phel/chhum mai si loh chuan a leu kuala inhliam a awl hle a ni. Chuvangin ei siam dawnin i chem a hriam nge hriam  lo endik la, a hriam loh chuan tahhriam nghal tur a ni. Chandam tha tak neih te hi a pawimawh a, chandam pawh sa channa leh thlai channa neih hran a tha. Sahringah hian hrik chitam tak a awm a, mihringtan tha lo hrik pawh a awm duh bika, sa kan channa chem leh chandam te hi thlai, thei leh sa hmin tawh ei mai tur chan nan hman loh tur. A dang hman tur a awm loh chuan silfai hnuah hman tur. sahring kan khawihna kut pawh thil dang khawih hmain silfai ngei ngei tur.

(c) Thianghlimna

Choka, kan chettlana, bungbel, hmanrua te a thianghlim mai bakah ei siamtute pawh kan thianghlim a ngai a. Ei siamtu chu a tawp tur a ni lova, sam sei a nih chuan a sam tawn emaw zial emaw ni se, ei siam dawn chuan lukhum khum ngei ni se a tha; sam leh luphutte eiinah a tlak theih vangin. Ei siam laiin hnar, hmai, lu, taksa reng reng kan hiat emaw kan khawih emaw a nih chuan kut sil ngei ngei tur, mihring taksaah hian hrik chi hrang hrang a awm a, chung hrik chu kan ei siamah a lo tel palh chuan kan eiin siam eitute natna a thlen thei a ni. Ek-in kalin emaw, hmunphiah leh thil dang tawp deuh kan khawihin emaw kut sil ngei ngei tur a ni a, kut sil hnua kut kan hrukna puan pawh fai tha tak a ni tur a ni. Thleng, fian leh no te hi fai taka sil tur a ni a, a silna tui pawh a tawp tur a ni lo.

(d) Natna tlanglawn leh i thil hman i hrechiang tur a ni

Ei siam lam leh natna tlanglawn hriat a tulna chu inkungkaih lo viauin kan ngai maithei, mahse pawimawh tak a ni. Inchhungkhurah emaw, chawdawrah emaw ei siamtu i nih chuan thisenthlum zunthlum(Diabetes) leh thisen sang te hi kan hriat chian a tul. An nat dan leh an natnain a ngeih loh thil kan hriat a ngai a, an ngeih loh thil kan siam palh an ei chuan thawklehkhata nabuai nghal thei a nih vangin kan fimkhur hle a ngai.

Kan thil hman bawlhlo kan hriat chian a ngai a, mithenkhat chuan glutine tel an ngeih lova, a thenin badam(peanut) an ngeih lova, a thenin purunsen an ngeih lova, chutiang zelin thil dang dang te pawh ngeih lo an awm a ni. Chuvangin, i bawlhlo hman curry paste emaw, sauce eng eng emawhah khan enge an pawlh tih i hriat chian a ngai a. Mi tuemawin” badam ka ngeih lova telh suh” an ti anga a badam tak kha telh lo mah la, i bawlhlo hmanah an lo pawlh palh chuan i ei siam eitu chu a thih phah hial thei a, kan thil hmanate kan hriatchian hle a tul a ni. Ngeih lo tihah hian a then chu an natna avang a ngeih lo an awm a, a then chu an thisen milh loh(allergy) vang pawh a ni thei.

3. Ei siam dan tur

(a) A tuihnai tur a ni

Nula pawh tawphnawk deuh leh bawrhchhawr deuh a awm ai chuan thianghlim taka nalh deuh a inchei chu an itawm zawk thin ang hian, ei leh inah pawh thleng leh no chhe deuh, mawi lo deuhah tawphnawk zeta dah ai chuan thleng leh no mawi takah thianghlim taka fel khap a dah chu a tuihnai zawk thin a ni.Kan ei siam tur chu rawng inchawih mawi tawk turin a sen, a eng, a hring rawng thlai  pawlhin a timawiin a tituihnai a ni. Kan ei siam sa dahna tur hi kan thlan thiam a ngai a, kan siam dan tura zirin a pian hmang, a rawng te kan thlan thiam a ngai a. Ei tur kan dah hunah pawh berh luai lovin fel fai takin dah a, thlaihnah, thlairah, thei chanmawi emaw pangpar nen emaw a chei mawi hian a tiitawmin a tituihnai a ni.

(b) A rim a tui tur a ni

Kan eiinte hi a rim a zirin kan ngainain kan ngaina lo thei a, a rim a zirin kan tenin kan ei chak thei a; a rim hi a pawimawh hle a ni. Kan ei siam a purunsen leh var kan hmui ang chi te hi a rim tituitu a ni a, a rim hian tuina a keng tel a vangin a rim tui tur hian enge kan hman ang tih hi kan uluk a ngai hle. Sa rimna kan siamin bawlhlo tam tak a rim rehna turin kan pawlh a, chungzingah chuan a rim nam fal bik tur kan thlan thiam a ngai a. Entir nan uisa kan siamin lengmaser rim nam tir emaw, dirunhmui rim nam tir emaw, bawngsa kan siamin bahkhawr/khahkhuan rim nam tir emaw, sawhthing rim nam tir emaw, adt..chutiang zel chuan sa dang leh thil dang pawn inhmeh bik riau rim an nei a; chung chu kan chhinchiah thata a milh tur ang chu kan hriat a ngai a ni.

(c) A tui tur a ni

Thil tui dan hi a kha, a al, a hang, a thur, a thlum, a phak, a thak leh a hiar te hi langsar zualte an ni a, eng ang hian nge a tui dan kan siam dawn? A thur, thak, hang, alin nge i siam dawn, a thur, thak, hang, al bawk kha bawkin? hetiang hian i ei siam tur a tui dan tur chu i siam hma khan inzawt hmasa la, chuta i duh dan leh a inhmeh dan tur ber chuan siam la; a inhmeh lo leh tui lo chu siam tawh lo la, mahse chhinchhiah kar la nakin thil dang i siam hunah i tih sual loh nan. A thur, a hang, a al leh thak a siamin a thur hi tak berah i siam thei angin a thak pawh a tak berah i siam thei a, heng a tuina chi hrang hrang pawlh khawmah hian engin nge ka ei siam hi hneh ber se tih hi ngaihtuah hmasak a tha. Thil tui tak siam duh chuan thil tui hlir pawlh khawm ila, a tui duh tlangpui. Kan ei siam reng reng tem chhin ngei ngei tur, kan tem chhin hnuah pawlh belh ngai pawlh belha a tui dan tur tawk a nih hma chu tem chhin a pawlh tur pawlh belh zel tur a ni.

(d) A hrisel tur a ni

Mihringten kan ei kan in thil zingah hian kan taksa tan mamawh, kan taksa tan tangkai vak lo, taksa tan tur te a awm a, chungzingah chuan a hrisel sel kan thlan thiam a ngai a ni. A hrisel thlan kan thiam mai bakah keimahni taksa mamawh kan thlan thiam a ngai bawk a ni. Vitamin C leh B te hi mei sa lutukah chuan a bo daih thei a, thlai kan siamin hmin lutuk lova hring mawi tawka siam hian a hrisel a ni. Hriak/chhitui tam lutuk a thil kan te hi a hrisel lova, hriak/chhituiah pawh ran thau atanga lakchhuah hriak/chhitui te ran thau ang chi reng reng te hi mihring min tithau hma a a hrisel lo. Ei siam nan a hman hriak/sahriak/chhitui zingah a khal awl a piang a hrisel lova, a khal har a piang a hrisel a ni. Thlai kan siamin hmin lutuk lo, thil kan kanin sahriak tam lutuk lo leh sahriak hrisel hmang thei ila, kan ei siam chu a hrisel ngei ang.

4. Ei siam hunah

Ei siam hunah kan hriat tur pawimawh chu mei tihsan hun leh tihhniam hun hriat a pawimawh a, i bungbel hman a mawng a bet duh em duh lo em tih i hriat pawh a pawimawh bawk. Tin, chhum emaw kan emawah a hmin har deuh chi sa thlak hmasaka, a hnuah thlai zingah a hmin har har atang thlak hmasak ang chi pawh hriat a pawimawh hle. Bawlhlo pawlh tur pawh thlak hmasak chi leh a hmin dawn a thlak chi hriat a pawimawh hle bawk. A hmin rualna tur leh a mawng a ut lohna tur a chawh pawh a pawimawh hle.

Tlangkawmna

Chhungkaw tan emaw, eizawn nan emaw ei kan siamin thil thar chinchhuah thiam tak (creative) kan nih hi a pawimawh a, chumi tur chuan thil kan chika, rilru kan pek a, phur tak a ei siam lam kan tih a ngai a ni. Kan chettlatna hmun hma, bungbel leh hmanruate chu a thianghlim tur a ni a, sazu leh rannung tihtawp theih lovin kan dah tur a ni. I ei siam chu mit-in a hmuh hunah it tura tuihnaiin, hnarin a rim a hriat hunah ril titam tur khawp a rimtuiin, kaah a luh hunah tui ti vawng vawng tura tuiin, pum chhungah a luh hunah taksa tan hriselna siamtu ni ngei se. I ei siam eitute tan a tui mai bakah a nuam tlem a tel theihna turin thinlung thianghlim tak karah duhsakna leh tawngkam thlum chuan han umzui nghal la chuchuan hmasawnna leh hlawhtlinnaah a hlang chho dawn che a ni.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in article, food & safety. Bookmark the permalink.

4 Responses to Ei Siam Lam

  1. op says:

    A van dik thei tak m!!ka rilrem tak ani irn swi khi…

  2. constantine says:

    tha hle mai..

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s