Mi tihdan kan zir dawn nge, kan tihdan miin an zir dawn?


Mizote hi mi kan hmusit zawng laileng hi chu kan tluk loh pawh ni se, kan hmusit lui ve khanglang thin a, kan ngaisan zawng lah hi ukchhuak lutuk hian kan ngaisang leh lawi si. Hnam induh ve tak leh indah sang ve tak angin kan langa, ataka kan nunpuiah erawh kan ngam zawng leh kan ngaisan loh zawng hnam lakah chiah kan indah sang a, kan ngaisan zawngte hnam lakah chuan kan indah hniam leh em em bawk si thin a ni. Kan mi ngaihsan zawngate tih dan lah a hnam pum deuhthawa zir mai kan ching hle.

Mi tih dan hi zir lo tur chu a ni chuang lova, thil tha a piang chu ka zir tur a ni a, amaherawhchu a zawng a za mahni chin chhuah awm lova mi tih dan kan zir a ni chuan kan nep hle tina a ni. Khawvel milarte incheina ang kan nei ve a intihtheih nana kan hman chuan kan nep hle tihna a ni, mi neih ang neih mai mai a vang a lo intih thei chu ngaituah chian chuan zahthlak deuh mai a nia ni a.

Sap tawh phawt chu mitam zawk chuan kan ngaisang deuh vek ti ila a sual awm lo e. An inchei dan te, an nun dan tha lo lai lai te lah chu kan zir ve zung zung a, an rinawmna te, hun an vawng dikna te, an thawhrimna te hi zir zawk ila hma kan sawnpui zawk tur a nia. Hmel en hrim hrima Asian hmel em em hian sap hmingte kan pu tlat mai hi kan hnam hian hming phuah tur kan nei lo pawh ni hlei lo, hnam dang hming kan inphuah ve rengawt hi chu kan dawn chiang lo a ni.

Tunlai tak hi chuan Korean-ho inchei dan leh nunphung hi kan zir leh hut huta, ngaituah chiang teh? mi tih dan, inchei dan zira phet phet hi mi tlawva, creative lo lutuk, originality nei lo lutukho tih tawk a ni. Mi thil chin thar thli thaw hian em ni kei ni Mizote hi min chhem pheleng kual vel mai mai dawn? Kan nula leh tlangval hmeltha deuh lah Sap, Chinese, Korean, Janpanese,adt.. vun var deuhho kan ngaihsanho a ang kan ti zo zel a, hnam dang an te hi kan la lawm zawk zamaha tlawmlak nachang kan hre lo leh nghal a. Mihring kei inti chuan mi an hi an chak tur a ni lova, mi nun dan leh inchei dan an va zir tur a ni lova, duh leh miin min rawn ang se, duh leh miin kan nun dan rawn zir se, duh leh ka inchei dan hi miin hnam dangin rawn zir rawh se, tih rilru hi an nei tur a ni.

Pu Rokunga’n,”Mizo kan ni kan hmel a tha kan tum a sang bawk si”, a tih kha khawnge tun lai mi te hian kan nei tawh lo em ni? mi inchei dan, mi tih dan zira kan phet kan phet hlawm ni le! Mi tih dan zir  rengawt hi tum sang chu a ni dawn em ni? Hmeltha awm lo hnam niawm ziazangin kan nula leh tlangval hmeltha deuh apiang lah hnam dang kan an tir zel si a, “Eng hnam mah kan ang lo Mizo hmel ngei kan ni, hnam dangin min ang zawk a ni”, tih lam hawi te hian ngaidan nei ve tawh i la.

Mizo hnam thuam chi hrang hrang ze mawi tak tak atanga tunlai taka an design te hi khawvel pum huap pawn a zahpuiawm lo, kan fashion designers te pawh an zahpuiawm lo. Kan hnam thuamte hi hnam dangin min tih lar sak dawn lova, keimahniin kan hluta kan hak lar a ngai a ni. Nunphungah pawh ni se, Mizo nungphung tlawmngaihna, aia upa zah, nula chuan a nulat chhung a thianghlimna vawng tlat,adt… te hi nun ze mawi tak a ni a, hnam dang te pawn an lo nunpui ve theih nan tan i la thar leh ang u.Mahni mi leh sa te ngaisang lova, hnam dang kan ngaihsan daih chhung chu kan nunphung leh kan rilru chu hnam dang salah a tang tihna a ni.

Khawvel hnam hrang hrangten “Mizo inchei dan, Mizo nunphung, Mizo lumeh dan, adt..” tiha an rawn zir ve huai huaina turin tun atang chuan mi tih dan zir  zir tawh lovin mahni ngeiin thil thar, thil tha i ching thar zawk ang u. Mizo an tih chuan “Nunze nghet nei, mi taima, mi intodelh, mi tlawmngai, inchei thiam, mi dik” tiha khawvelin min hriat theih nan, kan hnam nun leh kan hnam thuamte hi i chawisang thar leh ang u.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in article, Culture and tagged . Bookmark the permalink.

8 Responses to Mi tihdan kan zir dawn nge, kan tihdan miin an zir dawn?

  1. caribou says:

    I thuziak chu a tha kher mai. Keini zawng midang ngaisang a, an tihdan anga tih vea anmahni an phet tum thin kan ni. Incheina ah ngat phei chuan fashion thar ber ber kan inbel a, model ho leh celebs ho hak ang apiang hak ve kan tum ngawt thin. Kan thenawm state te chuan incheina nghet an nei asin.

    Ti mai mai teh ang, khumbeu te hi kan tilar a, milian lo zin te pawh pek kan ching thin. Mahse keimahni ber hian kan khum peih hauh si lo. Iptechei te pawh hi kan chawi lar ang ai hian ak peih kan tlem khawp mai.

    Sap leh vun ngo hi chu kan va han ngaisang veng veng tak e aw… Chutihlaiin, mitha leh fel tak pawh nise, vunhang erawh kan ngaithei lo bur ve thung.

    • zochepa says:

      @caribou, ka thu ziak min rawn hlutpui thin ka lawm tak zet a ni. Nia, tuna kan dinhmun mi tihdan zir reng renga kan khawsa hi a nia ka vei em em thin ni, changkanna lam zawnga mi tihdan zir chu ni ila a pawi lova, sum hek zawng leh kan nep zia lan tirna mai a ni si hi a ni buaithlak ni.

  2. H.Vangchhia says:

    I sawi phawng2, a dik phawng phawng. Mizo chu kan extreme alawm. Engkim hi kan la vung tuk a, kan ngaih lah a sam leh hle lawi si a!

  3. A dik hlawm hle mai. Atlangpuiin,Asian hi chuan sap ho hi chu kan ngaisang deuh vekin ka hria. Hnam upa leh changkang hmasa an nihna avang hian.

    Hnamdang, keini aia changkang leh fing hmasa zawkte ngaihsan a dik lohna ka hre hran lova, mahse uchuak taka; mahni hnamzia leh tihdan ngaihnep phah nan a kan ngaisang anih erawh chuan, kan hnam a boral mek tihna ani ang.

    • zochepa says:

      Chinese-ho hi an culture leh tawng hi an humhalh tha khawpin ka hria, ram dangah chhuan enge maw zat thleng lo awm tawh pawh hian an tawng leh culture hi an la vawng thei tlat zel an fakawm khawp mai.

  4. dolerich says:

    I blog hi ka lo luh vawikhatna a ni chauh mai! Hetiang lam hi kan mamawh ngawtin ka hre thin. A tam thei ang berin chhiar se ka ti ngei mai.

    • zochepa says:

      @dolerich, i rawn len luh vangin ka lawm e. Tin ka thu ziakte min hlut sak a vangin ka lawm leh zual. I hman changin i rawn leng fo dawn a nia.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s