Zofate kan inneih chhan


Thuhmahruai

Keini Zofate hi kan inneih hian a chhan bulpui ber anga lang chu kan induh vang,kan inngainat vang leh hmangaih vang niberin a langa, heng induhna, inngainatna leh hmangaihna a lo chhuahna chhan hi a inang lo thluah thei a; a hunlai milin a danglam zel ve thei tho bawk awm e.

1.Kan inneih chhan chi hrang hrang awm thei

Thenkhat chu an zaithiam vang emaw, an lam thiam vang emaw, ball pet an thiam vang emaw, music an thiam vang emaw, an hausak vang emaw, lehkha thiam an nih vang emaw, hna nghialnghet an neih vang emaw, an fel vang emaw, an lar vang emaw, an fin vang emaw, an hmel that vang emaw, an taimak vang emaw, an nung chang that vang emaw, adt…tein neih atan kan duh thei a ni.

2.Eng tiklai pawha thing thei lo

Kan inneih chhan zinga engtiklai pawha thing thei lo chu, hausa, hmeltha, nungchang tha, fel leh taima te hi a ni. Heng zawng zawng hi chu hmanlai atanga tun thlenga thing thei lo a ni.

3.A hunlai mila kan duh zawng nula

Hmanlai pi pu te hunlai kha chuan la deh thiam, inchhung khawsak thiam, lo lam hna thawh thiam ang chi kha an duh a ni. Hun a kal zel a eibar zawn dan te a dang  a, kan nula te pawn la an dek ngai tawh lova, zirna lamah te, thiam thil eng eng mawte an zir a; nulate pawn sum an zawng ve tan ta, mo, nupui atan ladeh thiam rengawt ni tawh lovin sum zawng thiam , thiam thil nei, lehkha thiam te kan lo duh ta a ni.

Nulate zingah chuan hmeltha, nungchang tha, taima, hauhhawm leh fel hi hman lai tang tun thlenga kan inneih chhan zinga pawimawh berte an ni awm e.

4.Ahunlai mila kan duh zawng tlangval

a)Pasaltha : Pi pu te hunlai kha chuan  pasaltha kha an ngaisang em em a, pasaltha ni tur hian sakap thei rengawt a ni lova, mi huaisen, mi tlawmngai, mi inngaitlawm nih a ngai a ni. Tin, pasaltha tih hi an mahniin an invuah thei ngawt lova, an chet dan leh an thil tih a zirin miin an ko mai zawk a ni. A hunlaia pasaltha nihna hi tunlaia Nobel prize dawng ang hu vela ropui leh mi ngaihsan a nih vangin nulate pawn neih atan an duh bik a ni.

b)Sipai :Hun a lo kal zela Sap sipai leh Burma sipaiah Zofate an han tang ve a, an tan tantirh vel kha chuan an hlawhte kha a hun lai milh chuan a thain, eiin leh thawmhnaw an dawn te a tha a, sipai uniform thar hlak haa khawlaia an han len vah vel chuan an khuaa nula an duh duh hi neih atan an kawk thei e tih khawp khan a to va, an ngaisang a ni.

c)Lehkhathiam : Hun a her zela zirna lamah kal na chang kan hre tan a, zirna lama zir sang deuh lehkha thiamho to(Luck) hun a lo thleng ve leh a. Lehkha thiam zir sang deuh kha chu fing tak leh thil engkim mai hre tur deuhthaw khan kan ngai a, kan ngaisang a to pawh an to reng a ni.

d)Pastor : Hun inher zelah Christian sakhua kan lo nih takah chuan pastor kan neih a lo ngai ta a, pastor ni hmasate kha ngaisan an hlawh a. Pastor ni tur kha chuan nungchang tha leh lehkha thiam deuh te kha a lo ngai a, makpa atan pasal atan mi tute pawh khan kan duh deuh fur a ni.

e)Sawkar hnathawk(Officer) : Hun a liam zel a kan eibar zawn dan te a dang zel a kan khawsak phung te an dang zel a, lehkham thiam zir sang  nazawng leh pastor te chu an to ta vak lova, sawrkar hna thawk officer-ho to hun a lo thleng ve leh a, officerin nula an rim tawh chuan nu leh pa leh nula te pawn an be tha thei hle a, neihloh kha an hlau em me mai a ni.

f)Ram dang kal(Sap ram kal) : Hman deuh atang tun thleng pawh hian Sap ram kal hi chu kan la ngaisang hle chuan a ang. Hman deuha ram danga lehkha zir emaw hna thawk emaw te kha an la tam lo bawk a ngaisan  an hlawh a an luck pawh an luck a ni. Tunlaiah phei chuan ram danga hna thawk, lehkha zir leh awm hlen kan tam ta hle a, a biktakin Burma lamah phei chuan mi a sing telin an kal chhuak a. Ram danga an va khawsak tawh chuan nupui tur an chah a, an khaua an awm lai a miin engamah an ngaih mang loh pawh khan an khaw nula tha tha an thur nawlh nawlh mai a ni. Chin state-ah phei chuan khaw then khan chu ram dangah an kal chhuak nasa lutuka khaw-3 kha khaw-1ah an awm khawp rengawt a ni.

Ram dang atang an chhungte nupui an zawn tir a an ko va; chu chu Parcel or Bungos(Malayu tawng) an ti a, he thu hi tunah pawh kan sawi ber tur chu a ni.

Parcel or Bungos(Malayu tawng)

Parcel a inneih hi tun hnai mai a kan chin thar angin lang mahse, hmanlai pawh khan khaw danga mi nu leh pat’n an fapain a hmuh ngai hauh loh nula an va be chawt a an inneih tir mai te a awm ve nuk tho a ni. Hmanlai kha chuan kan thlen chin kha a thui vak lova, tunah erawh kan thlen chin hi a hlain a thui ta hle a, khawvel ram hrang hrangah kan inpharh darh ve tawh a. Hmanlaia khaw dang a mi an va inbia an neih mai ang khan tunah chuan ram dang atang inbe remin kan innei ta a lo ni.

Parcel-a innei zingah hian tifuh lo, nei fuh lo pawh an awm ve zauh zauh a, inhmu ngai lo leh inhre chiang mang lova innei ta mai an ni vangin an rin lo ang ta vak lo pawh an awm ve a ni. Chutiang avang chuan mithenkhat chuan  hmeichhe lam rosum um lutuk anga kan sawi fo mai hi a fuh ber lo a ni. Parcel-a innei zingah hian innei rema fanau nen a awm hi an tam zawka, tifuh lote hi chu kuttang thliaka sawi tham lek an ni awm e. Inhre chiang em em, ingngaizawng rei em em tawh innei zingah pawh mi tam tak inthen leh tifuh lo an awm a, kohhran dan thianghlim hmangin a ropui thei ang bera innei zingah pawh inthen leh tam tak an awm a. A ruka inru chhuaka innei zingah pawh mi tam tak tunthlenga innei hlen leh chhungkaw hlimawm tak siam pawh an awm trueh a, inthen leh pawh an awm ve bawk a ni. Eng ang pawn lo innei se, inthen leh innei hlen hi chu an awm ve zel a, parcel-a innei an nih vang a tifuh lo inthente hi kan dem vakna chhan tur a awm chuang lo, chi danga innei zingah pawh tih fuh lo leh inthen chhiar sen lohvin an awm tho tih hi hriat tur.

Genesis Bung-12 a bung puma kan chhiar chuan Isaaka pawh kha Parcel-in a nih kha nupui a nei ve ni, a hmuh ngai miah loh leh a hmelhriat ngai miah lo kha an chhiahhlawh khan a va behmina Isaaka nupui atan a rawn hawn a nih kha.

5.Rosum um

Nulate leh an chhungte hi rosum um anga ngaih mai hi thil awl tak tur a ni a, i farnu, i fanu, in chhungkhat zinga nula tan an pasal tur chu duhthlan tur awm ta se, an nunphung leh a mizia inang rengah chuan a neinung deuh zawk chu tupawn kan duh a rinawm. Tin, nulate hi an hmahun an tanghma tur hi an dawn ve a ngai a, an nun nawmna tur leh an khawsak harsat lutuk lohna tur hi an dawn ve a ngai ni. Genesis bung-12 bawk hi kan en leh chuan Abrahama chhiahhlawh khan Isaaka nupui tur Rebeki a va biak khan a pu Abrahama hausak zia leh Isaaka chu rokhawmtu tur a nih thu a sawi a, Rebeki kha thil hlu ngun leh bengbeh te a pe a, a nu leh pate pawh rosum tam tak a pe a ni kha. Khang zawng zawng kha pe lo ta se, Rebeki khan Isaaka kha neih atan a duh ang em? Rebeki nu leh pate khan neih an phal sak ang em? Hmanlaia  khaw dang nula an fapa tan an va be chawt ang te pawh kha a betute khan an biak ngamna chhan a awm a ni, mi hausa, khuangchawi, thangchhuah, lal emaw an ni vangte a ni thin a, nula lamte pawn hmu ngai miah lo leh eng mi nge a nih pawh an hriat mang loh phal taka an lo pek mai chhan te pawh kha tam takah chuan rosum vang a ni a tih theih awm e. Heng din hmu hi rosum um kan tih dawn chuan a tih thei a, a nihna takah chuan mihring nihphung a ni.

6.Nula zawng zawng hian rosum an um vek em?

Mihring nihphungah rosum hi chu kan ngaina tlang vek a, nulate hian an pasal atan hian rosum nei kher an ti vek kher lo, an mizia, an nungchang, an hmangaih zawng, an ngainat zawng, adt.. ang chi an nih vanga pasal atan an duh leh nei ta pawh chhiarsen lovin an awm a ni. “Hmeichhia leh uite a chul nel peih peih”, tih tawng kam atang hian rosum vang ngawt chu a nih hmel loh, a chul nel peih peih leh a cheng hria a piang hi an to ni maiin a ang zawk.

7.Kan neih turate kan thlan uluk a ngai

Hmanlai kan pi leh pute khan nupui pasal inneih dawnin an thlahtuteah kutkem nei an awm em? piangsual an awm em? Natna thalo nei an awm em? tih ang chi te hi an lo uluk hle a ni. Kawl thufingah pawh , “Kum-1 lo vah fuh loh chu kum-1 tan a ni a, nupui pasal neih fuh loh erawh kum khaw tan a ni“, an lo ti a, kan inneih hma hian kan chik uluk hle a ngai a ni. Ram danga awm kan ni pawn, internet leh phone atang kan biain kan inrim thei tho a, uluk taka kan in thlingthlaka kan inthlan a ngai a ni.

Tlangkawmna

Keini zofate hi hnam tlemte kan nih angin kan inhumhalh that a ngai hle a, ram danga awmt’n mahni mi leh sa ngei neih duhna thinlung an la nei hi a lawmawm em em a ni. Mahni awmna ram hnam dang mi neih kan pawisak loh hun hi a thleng ang tih hi a hlauhawm hle a ni; chutiang hun a lo thleng palh a nih chuan kan hnam hi kan te  tawlh tawlh ang a, kan boral mai ang tih hi a hlauawm hle a ni.

Miin min neih duhna chhan tur zingah kan hmel a tha lo a ni maithei e, rosum lamah tal tan la ila. Rosum kan nei lo a ni maithei e, thiamna finna lamah tal tan la ila. Thiamna finna pawh kan nei lo a ni mai thei e taimakna leh nungchang lamah kan nun uluk i la kan phu tawk chu tute pawn kan tawng ngei ang.

Ram dang dangah inrel tham zet Zofate kan awm ve ta nuk a, mahni khua leh tui a mi ngei kan in-parcel rem lo a nih pawn kan awmna awm ve keimahni mi leh sa ngei hi i innei tawn ang u. A chhan leh vang dang vak pawh awm lo mahse, kan mi leh sa, kan hnampui, kan chipui, kan zohnahthlangpui ngei an nih vang tal hian i innei ang u, chu chu hnam humhalhna a taka kan nunpuina a lo ni dawn a ni.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in article. Bookmark the permalink.

13 Responses to Zofate kan inneih chhan

  1. Dawldanga says:

    Keipawh ka ti thin, inneihna hi tih bung bung, biak in hawng kher etc. ti tein a ropui zia kan sawi thin a; mahse a ropuina kan tehna tur nia ka ngaih zawk chu Kristian Chhungkua an din ta em? Damchhungin an in kawp rem thei angem? tih lam a ni zawk tlat. Kan chhungte pakhat chu a pasal neih naah Rs. Nuai 10 bawr vel zet an sengral a, mahse zan khat chiah an inkawl thung. An inneih ni chuan ROPUI kan ti khawp mai :))

    Nupui pasal inneih hi thil namai lo tak a ni a, thlan fuh chuan hlimna kan insiam a, kan thlan fuh loh erawh chuan lungngaihna. I sawi ang khian tunlai chhanah chuan Phone leh Internet kan nei fer fur tawh a, Live a inhmu lem lo pawhin a in ngaih ve thei viau tih chu Net hmang thang ho chuan an hre fur mai thei :)) Chuvang chuan, ‘Khitiang chi khi apply ve i lo rilruk deuh a nih chuan inthiam lo duh reng reng suh’ 😉

    • zochepa says:

      Inneiha ropui deuha tih hi a bik takin hmeichhiate hian a duh leh zual a, awlsam tak leh mitlemtea inneih buatsaih tur anga inhmin vek tawh pawh hi, hmeichhe lam hian an thiante, an chhungteho hian an fuihpawrh an fuihpawrha ropui ve deuha inneihna buatsaih hi an nawr tlu leh ngei ngei zel.

      Inneih inkutsuih thleng hi chu hmeichhe lal hunah ka ngai a, nupui pawh nei ve dawn ni ila, ka nupui tur duh dan hi ka zawm chuan a rinawm. Keima duh dan erawh awlsam thei ang ber hi ka duh dan a ni.

      Tun dinhmun ang zel chuan parcel te pawn kan nei lo ang tih a sawi theih loh 😀 Mahse, hmelhriat ngai lo chhungte leh thiante biak rem chawp neih erawh ka tlawmlak zawng tak a ni. 😀 Ka farnute leh ka nu te pawh “Ka nupui neih tur leh tur loh chungchangah hian hmeichhia rawn inrawlh su”, ka ti hmak. 😀

      • Dawldanga says:

        Nia, Para hmasa bera i sawi ang hian hmeichhe duhdan in kan kal chawk reng a ni. Kei pawh ka duhdan chuan a awlsam thei ang ber, in kutsuih pawh zanah ni thei se te ka ti ve thin; mahse a hun a lo thlen meuh chuan hmeichhe duhdana kal a ngai duh chawk.

        Tlawmah la duh mah ta che, hmeichhe fel chu nang aiin i chhungten an hre zawk daih ang chu, hnam dang neih i tum te a nih si loh chuan 🙂

  2. TSA says:

    A tha hle mai. I ziak chipchiar khawp mai!

    Hriatchian loh neih ngawt hi risk a sang ka ti khawp mai. Ka ngamin ka ring lo.

    • zochepa says:

      Hriat chian loh neih chu ni e, tihfuh loh a hlauhawm leh zual ngei ang a, mahse, hrechiang em em ang inngai innei ta te pawh hi “Rin i va ang lo ve!”, ti tawk hi an awm ve chek a nia. 😀

  3. caribou says:

    I thuziak hi tukinah blanket hnuaiah ka mobile atangin ka chhiar a. I ziak tha khawp mai. “Kum-1 lo vah fuh loh chu kum-1 tan a ni a, nupui pasal neih fuh loh erawh kum khaw tan a ni“, tih te hi a va lo dik tak em. Inneih hnua fanau awm ve duah hnua inthen leh lah hi thil fuh lo ber a lo ni tawh bawk si.

    Nupui-pasal thlan thiam hi a lo harsa asin aw…. Nulat-tlangval lai chuan mahni tawkah kan nalh lai ber leh kan thatna lai ber zel kan lantir a, kan hawihhawm em em bawk. Mahni nihna dik tak thup theuh chunga nupui-pasal inzawng kan ni a, tih fuh loh fe fe chu awm thei tak tur chu a ni reng a ni.

    Kei pawh hi lehkha thiam ni lo ila chuan mi hmuhsit mai mai tur ka ni tih ka hai lo. Sakhmelin puak a ti bik lem si lova, nupui tur pawh ka hmu zolo hial maithei asin. I ziak tha khawp mai.

    • zochepa says:

      Ka thuziak min hlutpui thiama ka lawm e. Nia, nupui & pasal zawn hi a awl vak lo aniang, keipawh he ka uluk lutuk vang nge tunthleng ka la neih lo hi. 😀

  4. rp Pachuau says:

    Ka lo leng lut ve hlawl mai; hei in lo va chai ropui ve, inneih lam sawi chuan Ts-ate hi kan tifimkhur lutuk ang tih chu ka hlau.

    Vaihoin an hman ber arrange leh parcel hi a inang turah ka’n ngai ngawt. Kan thawktu pakhat chuan(vai) kan inneih dawn tukah ka nupui tur ka hmu a ti, risk a sang khawp mai.

    Lehlamah chuan heng arrange kan tih ang chi ho hi a nuam ru fu duh lawm maw chu..te ka ti mai mai.

    • zochepa says:

      @rp Pachuau i rawn leng luta ka lawm e. Nia Vaiho arrange nen hian parcel inneih hi a ainang deuh rauh. Hmelhriat ngai miah lo han inei tur chu rilrua awmdan hi a nuam danglam ve fu maithei a ni.

  5. Engpawhchu nise, engtik-ah nge Inneih Sawmna i hnena atangin kan dawn dawn tih hi ka rilruah alo awm mai mai a! 😛

  6. irenehnamte says:

    Inneihna chungchang chu i ngaihtuah nasa hle thin mai. Hnam dan phung hrang hrang pawh i hre teuh dawn a. A tha in puahchha nasat tluk a awm lo. Dam chhung a tan a nih avangin…Seki ang hian in inneih sawmna chu kan lo dawn ve ngei beisei phawt teh ang.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s