VANNEIPA LEH VANDUAIPA


Vanneipa leh Vanduaipa inthlauh zia

Khaw pa-1ah hian Vanneipa leh Vanduaipa hi an awm a, nikhat chu ramsa thang kamin an ram chhuak dun a. Vanduaipa chu kawng chungah a kal a, Vanneipa chu kawng hnuaiah a kal a; Vanduaipa chuan lung a rap lum thla palh a. A lung lum chu vanneihpa zawnah chuan a lum thla a, vanneih thlak takin Vanneipa a va den hma chuan mi sa-thang kam ngul a va deng fuh a, sa-thang chu a per ta a, thang ngul chuan lung chu a vaw chho leh a Vanduaipa chu a va deng fuh chawrh mai a.

Tichuan, thang chu an duhthusamna hmun ve ve-ah an kam ta a, a ni thumna niah thang belin an kal leh ta a:

Vanneipa: Vanneipa thang chuan keipui nupa a lo awk a, keipui thi tur tal vel chuan a sir a zuk chal ki mawi tak mai chu an beng hlum a, sazuk thi tur tal vel chuan a sir a vahrit nupa chu a delh hlum a. Vanneipa chuan a thanga awk leh a chhehvel a a thil hmuh chuan a ti lawm hle a, khaw lam panin hmanhmawh takin  an khaw ho pun tur a kal chu a inchhuih palh a. A inchhuih thinur lutuk chu a chhuih fuh mi lung chu  a phawk a vawm bo deih a tum a, a ni lunghlu hi a lo ni a. A tho chiah chu thingzarah a in tauh a, a thinurin thing zar chu a chempui nen a sat chhum a, a ni a chhungah thingrai tha tak mai hi a lo awm a. Tichuan hmanhmawh tak leh hlim tak a haw chu an khaw dai thlanmual hlui a thlen chuan a tlahawlh a,”Eh eh ee hmanhmawh naklaiin”, tih pah chuan a ke chu an phih deuh vak a. A tlakhawlhna  khuarah chuan hman laia ro an phum rakkachak leh thil hlu tam tak a lo awm a. An in a thlen chuan an nuin fa phir a lo hring a, an kelpui-in no pali a lo hring bawk a, an bawngpui pawn no phir a lo hring ve bawk a, an vawkpui pawn no sawmpahnih a lo hring ve bawk a. An arpui pawh tuikhatah phir zelin tui sawmpahnih a lo awp keu bawk a ni.

Vanduaipa: Vanduaipa  chuan a thang bel tura kal chu a thang awmna a theihnghilh a,a thang zawng chuan a hawi vual vual a, a thangah chuan amah leh amah a inawk a. Thangin a phih cho chu khuaipui bu a va vaw fuh, khuaiin an zuk nghek a. A tlak lamah hling kungah a tla a, hling kungah chuan teivang bu a va delh fuh teivangin an lo seh rawn leh nghek a. Hling kung atang chuan a thang hrui chu a phelh a, a tla chu uiteme karah a va tla leh. Pem deuh nung, vung luk bawk, thak sup sup bawk chuan meng hlei thei lo chuan haw lam a pan a, ketin thlawn hlawk khawpin lungah a inchhuih zui, a tho chu thingzar a va tauha ha-hmai bal hawk khawpin a tlu bawk leh thlawrh a. A kal pei truan truana, khaw dai a thlanmual hlui a thlen chuan thlankhur hluiah a tlahawlh, a ke a rap ulh. Chunaklaiin tit-in a lo seh zui. An in a va thleng chu an nu raichehin a lo thi, an kelpui leh pa, an vawkpui, an bawngpui leh pa pawh raichehin an lo thi, an ar thleng raichehin an thi vek.

An thang kam hma mumang

a)Vaneipa mumang: Thang an kam dawn zana Vanneipa mumang chu: Vanneipa chu saivar chungah a lo chuanga, lui tui fim em em mai hi an dai lai mekin saivar chung atang chuan sangha phek var lianpui pui hi sai chung atang chuan lensuah nen a lo awk a. A haw kawngah chuan Pi Malsawmi, Pu Chengluta, Pu Rongheta leh Malsawmzuala te chuan an in thleng turin an lo dil a. An ni ho chu an inah thlen  a rem ti a, kawng lakah chuan pangpar mawi tak tak leh thei hmin mawi tak tak leh tuihnai tak tak mai chu an lo haw teuh bawk a ni.

b)Vanduaipa mumang: Thang an kam dawn zana Vanduaipa mumang chu: Vanduaipa chu an lukapuiah a mut mai mai lai chuan chhumthimpui a rawn zing mup mup mai a, thawk leh khatah thlipui leh ruahpui vanawnin an rawn nuai ta chiam mai a. Tui nu vut vut mai chu a rawn lian ta chiam mai a, leia rul tur nei ho chu a sang lam panin an in chhungah te chuan an lawn kai a a nupui an chuk a, an ran te chu an chuk a, a huan hungna a that loh vangin a nupui leh an ran zawng zawngte chu tui lianin a la ta a ni.

Khuavangin Vanduaipa tanpui an tum

Vanduaipa chu a hliamte a lo dam deuh hnu chuan ram hnuaiah thlai,thei leh rawtuai te zawngin a chhuak a. Khuavang hovin an hmuhin an lainat em em a,”Hepa hi i tanpui ang u”, an ti a. A kalna zawnah tak chuan rangkachak bel lian tak mai hi leiah an hung a, a hawi vual vual a hawi vual vuala, rangkachak bel chu a chhuiha atlu bingbilailet tawp mai a. En zui lem lo chuan a kal san leh a, “Chunglam ka hawi vang”, a ni tihin inchhuih leh a hlauh vangin hnuai lam bih chung chuan a kal leh ngur ngur mai a, khuavang ho chuan, “Hnuailama Kan dah a hmu thei si lo va chunglamah khai i la a hmu mahna”, an ti a; chunglamah chuan an khai ta a. A inchhuih leh hlauh vangin hnuailam bih ngur ngura a kal vangin a rangkachak bel chu lu hai rum rum khawpin a tauh chawrh mai a, a lu a dawm vawng vawnga; a thil tauh chu en zui nachang a hre leh chuang lo a ni. Khuavang ho pawh chuan,”Tanpui theih pawh a ni lo a mah hian zir ngang lo a ni”, an ti ta rengawt a ni.

Vanneipa hi a vanneih vang hrim hrim em ni?

Vanneipa kan tih hi a hming tak chu Zorema a ni a, unau-7 zinga naupang ber a ni a, a naupan lai atang a nu ar lawi, vawkchaw pek, kel & bawng enkawl a pui a. A nuin Ar,kel, vawk leh bawng chungchangte a hrilh hi dilchhut takin a nu a zawt let leh thin a a nu pawn thin sei takin a hrilh fiah koh koh thin a ni. A pa ram chhuahnaah te a zuia a pa hian ramsa chungchang , sava chungchang te, ramhnuai chungchang leh thlai,buh leh bal chungchangte a hrilh thin a, a dilchhut thei hle a, a pa pawn a zawhna te chu a hriatthiam theih ang tawk turin a hrilh fiah thin a. A lo len hnu pawn a mah hi mi chengvawng, thil chik mi leh taima tak a ni reng bawk a ni. A thil tihah a hlawh tlin loh pawn”Eng vang nge?”, tih hi a ngaituaha, a chhuta,a lehpekah hi chuan a hlawhtling ngei ngei thin a ni.

Tunah hian kum-30 mi a ni a a nupui hi a duat em em a, a ngaisak a,an nu  naupai lai atang  a ei chak zawng te, sangha,sava, thlai, thei,adt.. a duh zawng a piang chu an zawn sak a. A dam lo deuh leh an khuaa upa ho ramhmul damdawi hre deuh te “Eng damdawi nge pe ila tha ang?”, tihin a zawt kual vat vat a, upa tawnhriat neite zarah amah pawn thil a hriat tam phah em em a ni. A ran vulhte a duat a, chaw a pe tha, an chenna tur a siam sak tha a, an chenna leh an hual vel reng reng pawh a ti faiin a ti thianghlim reng a. A ar awpte pawh a hrik awm loh nan vaihlo artuibawmah a phul sak a, a no an lo keuin tha takin a thum a, arbawmah tha takah a lawi a, ni chhuah velleh a chhuah leh a, ar-in pawh hmun sangah tha takin a siam sak a, sanghar leh sihal te lak thei lohvin kawngkhar tha tak a siam sak a; a hun takah kawng a khar a, a hun takah a chhuah leh thin a ni. An ran te reng reng pawh an ke bai deuh emaw, na an neih deuh emaw chuan damdawi a zawn sak a enkawl dam sak vat vat zel a. Lo a fehin an ran tan ei tur a zawn sak a, an ar tan tlumpi emaw, khau emaw, teivangtui emaw a hawn sak thin a. An ran leh ar te chu an lo pung chak em em thin a ni.

Thang an kam tum pawh kha a thang kamna kha a uluk hle a, thang hi a kam ve mai mai lova, a kam dawn chuan a kamna hmun tur hi a uluk hle a,  ramsa khan a hria a, hre tur pawn a ngeihven a, upate a zawt a,a mah ngei pawn a chik peih a. A thang kamna kha sih kiangah a ni a ramsa leh sava te an tui halin sih tui tlan turin an rawn pan thin tih a hre chiang hle a; khata a kam chuan a hlawmchhahm dawn lo tih kha a hre sa a ni.

A chhevel thil awm a chik a, a chetsualna thil pawh a chik thin a, a chhan leh vang a zawng a e nge a nih tih a chik chiang hle thin a ni.

Vanduaipa kha a vanduai ve vang reng em ni?

Vanduaipa kan tih hi a hming tak chu Rothanga a ni a, unau pa-8 zinga naupang ber ve bawk a ni a. An ni chhung hi thingtlang khuaah chuan a neinung pawl a ni ve a, an fa tlum ber Rothanga hi an duat em em a, a duh a piang an lei sak a, a duh duhin an tal tir a, a ngen a piang an pe a. A lo puitling deuh hnu pawn lo lam hna pawh thawk tha fumfe lovin a khawsa vel mai mai a, lungkham em em a nei lova,, a ngaih a sam em em a, a nung pawlawh a,ngaihtuahna ril tak hi a nei ngai lem lo a ni. Zorema nen hian tette atang inkawm ngeih em em an ni a, Zorema aiin kum-1in a u hrat a ni. Zorema nen hian nupui an neih kum leh thla pawh a in ang a, a nupui naupai lai a a ei chak zawng te hi a ngaithah mai mai a; zawn sak a tum lem hlei lo va. A nupui nuamsam lo insawisel pawh,”Naktuk khua a var anga dam leh mai ang”, a tih san vel mai mai thin a. An nu chu eiin tha lo nen natna a neih te chu enkawl lohva a awm vangin a lo zual zela; a chak lova a cher tual tual a. Nau a neih khan a natna nen a chak lo vang nen a thipui phah ta hial a ni.

Ar leh ran an vulh ve lah an mahni tlat tlatin a tlat tir a an na leh an hliam vel lah a enkawl lem hlei lova, chaw lah a pe tha hek lova. An ar pul huan a thi te pawh phum mai lovin an thihna hmunah a trawih ral tir vel mai mai thin a, ar dangin a hri an kai phah a. An ran ke na, lei na ang chi teh pawh an ngaisak tawk loh vangin an inkai chhawng a; an thih vek phah hial a ni. A chunga an ar , kel pa, bawng pa pawh raichehin an thi kan tih kha a lo ni em em bik lo va, a enkawl that loh vanga hri a thi an ni hlawm zawk awm e.

Thang an kam trum pawh khan a thang kamna tur kha a hmun kha a ruam tha deuh a, thang ngul tur tha tak a lo awm kha rem chang kha ati em em mai a, ramsa chungchang lah hriat a bar a nei lo hriat tum lahin a ngaihven ngai lova, mi a zawt ngai bawk lova, a chik peih hek lo va. A thang kamna hmun  pawh kha chiang takin a lo chhinchhiah lova, a kamna hmun lah kha a lo buk ve deuh nen a mah leh amah a inawk ta a. A miziaah lah chesual khut khut chi, a chang leh enna ngai en deuh ngur ngur khaw dang hawi miah lova kal deuh ngur ngur chi a lo ni nen , a chhehvel thil awm te chik na chang lah hre hek suh. Khauvang ho pawna an tanpui theih loh khawpin, amah pawn a zir lo ve reng a ni.

Vanneipa-in Vanduaipa a enkawl

Zorema chu a lunghlu chhar te, a rohlu chhar te nen a mah a taimain rem a hre bawk nen an hausa ta hle mai a, Rothanga chu a maha parawl a nih tawh vangin a thianpa chu a enkawl a; a tul a piang a tranpui thin a. Rothanga chu vanduai bik riaua inngaihna a nei a, inawhhlum hial te pawh a tum tawh a, Zorema hian a vanduai vang a nih lo zia te a hrilh thin a. A vanduai vang ni lo anga a sawi hi a haw em em a, nasa takin an inhnial thin hial a ni. Nimahsela, Zorema hian zaidawh takin a chhan leh vang a chhutpui a, a hrilh fiah a, nun dan tha , inchengvawng dan, thil chik dan, thil chhut dan te, remruat dan te, hriatna leh finna lam te nasa takin a sawipui thina. Kum-3 meuh a lo liam takah chuan Rothanga pawh  a inhmuh chhuak ve ta a  ni.

Vanduaipa aka Rothanga thu sawi

“Aw hring nun hi hriat thiam a va har tak em! Vanduaina kan tih nazawng pawh hi kan vanduai vang reng a lo ni lo va, kan at vang te, kan mawl vang te, kan pawlawh vang te, kan remhriat loh vang te, kan hriat loh vang te,kan thiam loh vang te, kan ngaihsam vang te leh kan khaw hawi zau loh vang te a thil tha lo lo thleng thin hi vanduainaah kan ngai mai thin a lo nih zawk hi! Vanneihna kan tih mi hlawhthlinna te, an hausakna te, a thiamna te, an finna te hi vanneih vang liau liau a a van tla dawng an ni bik hauh lo nia! An chik vang te, an zir vang te, an taimak vak te, an chhut peih vang te, chhel tak a an beih hram hram vang te a lo ni zawk a ni hi! Aw nu leh pa te hi fate nun kawng kawhhmuhtu atan an va pawimawh tak em! Ka nu leh ka pa te khan ka naupan lai khan ka duh duh dan in min lo awm tir lo se, hna thawh dan te, an tawnhriat te kha min lo hrilh se, thil tha leh tha lo te kha min lo hrilh  se la, nun kawng tha min lo kawh hmuh se la zawng ka nupui leh ka ran te kha ka chan lo tur a nia! Min duat an tih kha min tichhetu zawk a lo ni hi”

Chhun zawm leh tur……

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in Thawnthu, Uncategorized. Bookmark the permalink.

20 Responses to VANNEIPA LEH VANDUAIPA

  1. chhangte_ll says:

    A va han sei tehreng e…Print-out lak hial chi ani..lewlll..

    • zochepa says:

      Print-out la i fapa kha hril rawh. :)) Fiamthu ang leka ziah ka tumaka rilru a inthlakah thawnthu angin ka ziak thut a lawm. 😀

  2. b-buata says:

    Ka luh tirh chuan, avan sei em em ka tia,, ka’n chhiar a, ka chhiar chhuak rang khawp mai.. a chhunzawmna engtikah nge a lo chhuahleh ang aw… Naupang thawnthu mai a ang viau na a, a ngaihnawm danglam riau a..

    • zochepa says:

      b-buata ka thawnthu ziah tlawm tak min chhiar sak vangin ka lawm e. A chhun zawm chu thla thar lamah a rawn chhuah thih ka ring.

  3. Pingback: Vanneihpa leh Vanduaipa inthlauh zia (Thawnthu) - Zoin.Info

  4. caribou says:

    Vanneipa vanneih theih dan em em khi, a vannei pawh a ni zozai dawn emaw ni le!!!! Vannei leh vanduai inkar hi chu a lo inhlat thin mang e. I thuziak hi a ngaihnawm tham khawp mai.

    • zochepa says:

      Thianpa i tilawmawm thei hle mai, ka thu ziak tlawm takin min hlutpui thiam a, nasa takin thu ziah chakna pawn min siam phat thin a ka lawm e.

      Vanduaipa khi an vanduai dan khi a thuah a thipin a van duai a, a in thlahna tak chu a lang chiang bawk lawm ni? hahaha

  5. caribou says:

    Last para a i thuziak khi mahni leh mahni inzirna tham a ni. Vanneihna kan tih thin hi, a thlawnin van atangin a lo tla nal nal lem lo. Kan taihmak vanga kan hlawhchhuah te hi kan vanneihpui thin a lo ni zawk e. Mi, a thawhrimna avanga a thil dawn thin te hi a vanneih vangah kan puh sak thei dawn em ni? Mithatchhe tan hlawhtlinna kawng a inhawng lova, an tan vanneihna dawn tur a awm mawh hle bawk. Finna nena thawkrim apiang dinchhuahna khawvel anih hi.

    • zochepa says:

      Last para khi a point ber chu a ni a, mi tam zawk hi chuan kan thil tawn tha lo ,hlawhchhamna, natna, eng eng emaw te hi vanduai vangah kan puh fai vek a, a chhanchhui chian hi chuan a lo ni vek bik kher ngai lovin ka hria.

      Vanneihna pawh hi a van tla ang hrimin mi hlawhtlinna te hi ka sawi vak zel a, an thawh rimna leh an chhelna lam kan va en pui tawh thin lo hi a fuh chhiah lo a ni.

  6. TSA says:

    A va ngaihnawm triah triah em ve aw..! I ziah peih chhung ka chhiar peih e!

  7. TSA says:

    I phal phei chuan kan chanchinbu reng ruang ‘Fiamthu Huang’-a chhuah ka châk khawp mai. Source chiang taka thailangin.. I phal chuan…!

    • zochepa says:

      TSA, kei thu ziak tehlul ccb-ah i chhuah chak chuan chhuah rawh, ka thu ziak reng reng hi Mizo zawng zawng tana ka ziah a ni a, i duh a piang chhuah hmiah hmiah rawh.

  8. TSA says:

    Ka lawm lutuk e. March thla issue-a mi turin ka lo telh ang e. Hetiang thu hlimawm, zirtir nei tha leh hlu bawk si hi a tha ka ti a, ziak zel rawh.

  9. Liantuala says:

    Ka pate i va ziak tha em em, ka pate ziak zel rawh, ka pate i dam lai a ni maw?

    • zochepa says:

      Ka dam lai a ni e. “Ka pate” min ti a, ka buai zo ka nikhua lo lutuka tu ber nge i nih pawh ka ngaihtuah chhuak thei lo.

  10. Sima Khiangte says:

    A sei that em avangin ka comment e.

  11. loneeagle26016 says:

    Ka chhiar chhuaka ,a tha hle mai, a ngaihnawm bawk a, a moral foundation khi naupang hrilh tlak tak2 anih hi…chepa !
    Mizo Upa chuan vanduai tawh hi chuan a in zui zut mai an ti thin a, Pathianthu lam atang erawh chuan ‘victimised’ kan nih apiangin malsawmna kawng thar tur Pathianin min lo buatsaih sak thin tih ani thung….. han ziak zel teh !

    • zochepa says:

      @loneeagle26016 , i rawn leng luta, ka thu ziahte min hlu sak a ka lawm e. Tunlai chu ka hul lutuka, ka blog pawh ka update thei meuh lo, min lo hrethiam dawn a nia.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s