Mipa leh hmeichhia intluktlanna


Khawvel hnam hrang hrangte  kan thlir chuan hnam finga kan ngaih ho pawh hian, hmanlai chuan hmeichhiate hi an lo dahhniamin an lo rapbet nasa ve hle thin awm e. Keini Mizo te pawh hmailai ngaihtuah chuan hmeichhia kan dah hniam dan leh kan rah beh dan pawh a ziaawm tawh hlein a lang. Thang lo thar zelah chuan hmeichhiate hi mipa ai mahin zirna lamah phei chuan an titha zawk mah tawh a. Zir sang an tam zel a, hna sang pui pui thawk pawh an pung zel a, hmeichhia leh mipa intlungtlanna pawh kan uar chho zel a, famenism lam thlur bing leh zir chiangte pawh an pung zel a. Hmeichhe lamin mipa leh hmeichhia intluktlanna an rawn uar chho zel hi ka thlawp hle a, chutihlaimekin intluktlanna kan kalpui dan leh kan duh dan erawh bihchian deuh a ngaiin ka hria.

Mizo hmeichhiate’n mipa leh hmeichhia intluktlanna kan uar dan hi a thu neihna lam zawngah hian tran kan la nasa berin a lang a. Mipa tih theih leh hnathawh ang chi lamah erawh tran kan la tha duh vak lo a ang hle mai. Mizo society-ah hi chuan hmeichhe lalna chhungkua hi chu mi zah an kai em em vak lova, fiamthu thawh leh rel zuinan a hman mai mai hi an ching zawk mah a, kan thu neih dan leh kan lal dan hi a fuh chiah lo a ang. Tin, kohhranah pawh chhungkuaa hmeichhe lalna tam deuhna hi chu a buai duh deuh chuan a ang.

Hmeichhia leh mipa intluktlanna uar em emtute hi bus-ah emaw, khawimawlai hmunah emaw thutna chang lo se,Mizo mipa ho hian thutna lo kian lo se, “An va han tlawmngai lo, an va han polite lo”, ti duhtu hi an tam zawk mahin ka ring. Intlungtlanna kan duha kan uar a nih chuan ngahnge hmeichhia a nih vang chuan thutna kan kian kher a ngaihna ? Ngahnge hmeichhia ka nih vangin thutna min kian kher a tul ? tih rilrute hi pu tak ang maw?

Intluktlanna kan uar vang a, “Hmeichhia”, tih hi,”Minu”, tia thlak kher tum pawh hi a tul hran lova, mipa tih theih ang kha tih ve theih zel a, a nuna nunpui hi a tha zawk awm ma nge! Hmeichhia tih hi Mizo tawnga  hming pakhat a ni mai, ketaminu pawh hming a ni a, a pa pawh ketaminu tho a ni a, keipui pawh a pui an ni vek kher lova, hming a ni mai, Mizo tawng tihbawrhban leh sawi danglam kher a ngai lova, thil tih lamah intluktlanna chu lan tir zawk ila a fuh zawkin ka ring tlat. Kan uar luatah hian kan pirpak lutuk hian a chimawm zawngin kan awm hlauh dah ang tih hi a hlauhawm hlein ka hria.

Tuna kan chenna ram hi hmeichhia leh mipa intluktlanna uar tak ram a ni a, hmeichhia pawn bus, lorry,truck, taxi te an khalh a, motor chhe siam, mistiri leh tunhmaa mipa chauh thawh chia an ngaih ang hi tam tak an thawk a. Infiamna lamah pawh football inkhelh pawn mipa karah hmeichhia an tel ve a, tournament-ah pawh team thenkhat chu hmeichhia an tel nual a ni. Tiang khawpa mipa leh hmeichhia intluktluktlanna uarna ramah pawh mi tam tak chuan mak an la ti deuh hu tho a ni. Thuneihna lam pawh tran an lak angin hnathawhna, nitin khawsaknaah pawh mipa thawh ang leh tih ang kha an thawk a an nun pui mai a, hmasawnna tha tak pawh a ni. Bus chuan te pawn nula/hmeichhia an nih vangin thutna kian ngawt mah ila an thu duh thak lo, pitar,putar leh rualbanlo ho chu a tuate pawn thutna an kian vat zel a, hmeichhia ho pawh thutna kian rang hlei hleiah an trang zawk thin a ni. Heng ang hian keini Mizo hmeichhiate pawh hian nunpui ve ila, tun ai hian hma kan sawn ang a, kan society pawh kan ti hmasawn ngei a rinawm.

Mipa ho pawh hi inchhunga paber nihna dah lal hlura, mahni thu duh hlur hi a fuh ber lova, mipa nih vanga eirawngbawl,bazar kai, thuamhnaw suk, in leh huan tih fai chi reng reng hmeichhe tihtur chauha kan ngaih hi a dik lo a ni.

Tlangval pumpa hnathawh mumal pawh nei lova mahni mutbu pawh singsa peih lo,mahni chaw eina thleng pawh sil tum lo, chhungkaw ei tur eirawngbawl pawh tum lo, mahni thuamhnaw hak balh tak ngial pawh suk tum lo te hi kan sim a hun tawh. Hmeichhiate aiin tharum kan ngah zawk a, a thawh pawh kan thawk chak thei zawk a, tih kan tum lo bur leh kan tih tura kan ngai lo tlat leh kan tih chuan pa lo, thaibawi riau a inngaih tlatna hi kan sim a hun tawh. Kan tan inzirna tha nakin hnua loh theih loha kan la ti tur a ni a, kan thiam vek hi a tha a, chhungkaw inchhawk zangkhaina a nih bakah mahni tan a tha a, hnam hmasawnna pawh a ni.

Nu leh pate pawn kan fate hi zirna run hmasa ber kan inchhungkhur atang kan fate a hmei a pain inchhung khawsak relbawl dan engkim hi kan zirtir a hun tawh hle mai. Kan fate inchhungkhawsak relbawl dan kan zirtir loh vangin nupui pasal an neihin emaw, ram dang khaw dangah an mahnia an khawsak hunah emaw loh theih loh a an tih a tul hunah buana an tawk duh a, sum sengin eirawngbawltu lak emaw, dawra ei mai emaw, thawmhnaw suknaah mahni thawmhnaw sum senga va suk tir mai emaw a lo tul a, mi sum sen lohnaah sum an seng thlawn a, hnam dang ho nen hun an neih zat inang rengah a thlawnin sum an khawhral bik thei a ni. Mahni a kan inzir chawp a nih pawn mahni inchhungkhura lo tih than loh chu kan thiam vak lo a, mi aiin hun kan khawhral tam a; hah pawh kan hah duh a ni. Tuna keini thangtharte hi chuan kan nu leh pate’n min lo zirtir lo mahse, mahni inzir chawpin fa kan nei ve a nih pawn a hmei a pa a inchhungkhawsak relbawl dan kan zirtir vek a, hmeichhia leh mipa intlutlanna chu inchhungkhur atang kan zirtri nghal a lo ni ang a, hnam hmasawnna rahbi pawimawh tak kan rah tir a lo ni dawn a ni.

Ram dang hnam dang ho tih ang, nun ang chuan kan ti thei lo a ni maithei le, nunphung, culture leh kan chhehvel midang a vang te pawh a ni mahna. Mahse, kan theihna chinchinah thuneihna lam ringawt ni lo, thil dangah pawh intluktlan zel hi tum ila, hma kan sawnpui ngei ang. 100ah 100 intluktlang tur tak tak hi chuan a ni thei lova, Pathianin min siam dan leh a remruat dan pawh a nih hmel lova, kan taksa pian hmang pawh a inan lo ang bawkin kan thahrui neih dan pawh a in ang lova, 100% chuan kan intlutlang tak tak thei lo a ni. Nimahsela, hmanlaia hmeichhia an hnuaichhiah dan , an lo dah hniam dan, an tih ve thei tur pawh tih/zirna hun leh rem chang pe lova an lo rahbehna  erawh tam tak chu hmeichhia te hian an ti ve thei a, an nunpui ve thei a, mipa thawh ang, mipa zir ang, mipa tih ang tam tak tunhmaa an tih ngai lo hi an ti thei a, a thuneihna lam chauh nilo, a chimawm zawng pawh ni lovin Mizo society tihmasawn tur zawnga a taka tih leh nunpui hi a hun tawh tak zet a ni.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in Culture and tagged . Bookmark the permalink.

13 Responses to Mipa leh hmeichhia intluktlanna

  1. chhangte_ll says:

    Ka vei loh lampang tak ani, Farnu pahnih ka neia, kan en hniam tak pawh ka hre hek lo.

    • zochepa says:

      Mahnik farnute chu tuin nge enhniam ang? Hmanlai upa ho tawngkam atang hian, Hmeichhia leh pal chhia chu thlak tur, hmeichhe fininrun ral a kai lo,hmeichhia leh uipui chu lo rum lungawi mai mai rawh se, adt..” tih ang vel a tang hian kan hmeichhe en dan hi a hniam hlein a lang.

  2. keimah says:

    Pathian siam phung rengah hian kan inang lo em mai! Amaherawhchu, kan intluk tlang lo tihna lam erawh a ni kher lo ang. Hmeichhia hi nau pai tura duan a ni a, nau hnute pea chawi lian tura ruat a ni. Chu chu Mipain an ti thei lo. Chutiang chuan Hmeichhe nihphung tura Pathian duan lawk anga hmeichhia an nun hian a dik thlap a, chutah chuan Mipa aiin an hniam zawk tihna a ni lo. Mahni ve veah Mipa leh hmeichhia hian Special-na kan nei ve ve a, kan in ‘complement’ tawn ve ve bawk! Pathian siam dan phung kalha nung hnam apiang an buai tam a ni mai!

    • zochepa says:

      Hotupa isawi hi a dik khawp mai, hmeichhia leh mipa kan niphung hi chu Pathian ruatsa niberin ka hria. Chumi piah lamah hnam tin kan culture kalphung atang hmeichhia kan dah hniam deuh thin hi chu a awm ve deuh rengin ka hria, chumi avang chuan hmeichhia leh mipa intluktlanna pawh hi hmeichhia ho hian an sual ve ni bawkin ka hria.

  3. padula says:

    INTLUKTLANNA… tih khi definition fel fai deuh tak awm phawt se la maw le. A nih loh chuan MHIP ho in kan intluk tlang an ti zo chauh a, hmeichhe awm nem zawm chhawm dawl ngai an tih zawm leh ang vel hian a tawp mai anga sin maw le !!

    • zochepa says:

      Ka sawi tum tak chu, intluktlanna tura nasa tak a tan lak a, thuneihna lam chauh ni lo, hna chi hrang hrangah pawh hmeichhiate hian Mipa thawh chi chauha ngai lova thawk ve se, intluktlan duh si, awmnem zawk, chhawmdawl ngai ang a inngaihtlatna hi paihbo se ka ti deuh a ni.

  4. b-buata says:

    Keimah, comment khi ka zawm ve hmiah..

    … kan share ve lawkss. hman ni chu ka hmelhriat(hming thup) pasal neitawh hi a nu (pasala nu) te nen an awmho loh thu a sawi a. A chhan ka’n zawh chuan… “tlem lai deuh khan ka nu(pasala nu) in kan nupain min hnawtchhuaka, ka chhungte kan fin a, a hnu deuhah Ka Pa (pasala pa) a rawn hnawtchhuak ve leha, tichuan ka pa te nen chuan In kan luah hrang ta a” a tih chu maw le. A Nu chu a thu ve hle a niang.

    New Zealand ram chu a nawm hmel hle mai.

    • zochepa says:

      b-buata, i rawn lenglut a ka lawm e. I sawi ang deuh hi keipawh ka hre ve nual, an nuin a vua a, an pa a tlatchhuak a, mi inah a riak bo a, an nu lungawi hunah a haw leh thin tih vel, hmeichhe rapthlak deuh hi chu an hlauhawm a niang. 😀

  5. bawmrang says:

    “Mipa leh hmeichhia intluktlanna” tih hi chu hmeichhiate hi hmusit tawh lovin I chawisang ve deuhang u! tihna mai a ni lawm ni.
    “dan” in min inti tluktlan tir thei.a tak ramah erawh kanin tluktlang thei tak tak lo vang.

    he “intluktlanna” kan kalpui dan hi bih chian deuh chu a ngai.
    ka ngaihtuah mai mai thin a.
    kan veng vela midum nupa an in hauh hian, police an ko thin a.mipa zawkin hmeichhia zawk kut an thlak hian mipa hi an hruai thin a.
    hmeichhia zawkin mipa kut an thlak ve hian eng tin vak mah an ti hran chuang hlei lo va.

    “ei rawngbawl” tih lai khi….
    ka hne hluah hluah…….he he….:)
    ei rawngbawl hi chu eng ti kawng mahin ka peih thei ngang lo a ni… 🙂

    • zochepa says:

      @Sangpui nia i sawi hi a dik khawp mai,intluktlanna kan kalpui dan hi chu lehlam lehlamah bihchian chu ngai tak a ni.

      Eirawngbawl bawl ngai lovin, tlangval tak tak hmain nupui i nei a, i tan chuan a peihawm lo viau ang chu. kekekekek 😀

  6. Martin Chhakchhuak says:

    nia maw le…. hei vang hian a ni, nupui ka neih lawk loh ni…. hehe, intluktlanna hi faminist ho hian an thupui ber a ni bawk a, Pathian pawh pathian nu awm ang hriatna an neih tak kha maw….
    Ziak tha khawp mai….

    • zochepa says:

      @Martin Saksuak, i rawn lenglut a ka lawm e. Faminist-ho an awm hi a thatna tam tak a awm, idea thar an rawn siam chumi atang chuan ngaihdan tha leh tih dan tharr a rawn siam chhuak thi a, mahse extrme lutukho hi chu an buaithlak deuh chuan a ang. hehehe

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s