Mualsawmkuapakuavata


Mualzavata thlah kal zelah, nausen danglam tak kutzungpui tiat lek a rawn piang a. Tetakte e ti lovin, a thang duh em em mai a, thil a ei theih chin phei chuan a ei zah ang ang hian a rawn thang lian a ni. Tichuan rawlthar a rawn nih meuh chuan a lian hle mai a, a pa hnenah chem pui chher sak turin a dil a, a pa chuan changel hnah tiat lawih mai a chher sak a. Tichuan a pa lo vah a pui ta a, nikhatah mual sawmkuapakua a vat thei a ni, an thlahtu Mualzavat a chu a tluk lo deuh hlek a nih chu.

Tichuan, kumkhat a an buh thar chu ei sen rual loh a tam an thar a, a chhungte kum-3 ei tur vel chu kumkhatah a thawkchhuak thei a ni. An mamawh tuahthing tur lah tlang a thing lianpui pui mai chu a elh tliak hmawk hmawk a, awlsam takin a pu haw a, awlsam takin a chek phel vek a, kum-3 chhungah pawh tuah zawh rual lo tura tam chu a chhek khawm a ni. Buh chauh lo pawh thlai dang bal, vaimim, be chi hrang hrang, etc.. pawh tam fe a thar chhuak a, buh leh bal lamah an hausa hle a ni.

Nikhat chu a pa hnenah,”Ka pa hei buh leh bal leh tuahthing tur pawh tawk fang chu kan nei a, kum thum chhung chu hna thawk lovin awm mah ila, kan nghei dawn lova. Ka chakna te hi ka vanglai hun hian mite tanpui nan hman ka duh a, khaw dangah ka zin kual anga, tanpui ngaite tanpui tur ka zawng te ang”, a ti a. A pa chuan a fapa-in chutiang tlawmngaihna thinlung a pu chu a lawm hle a, lawm takin a duh duhna a zin turin a phal sak a ni.

Tichuan Mualsawmkuapakuavata chu a zin chhuak ta a: Khaw-1 a va thlen chuan puan senduk hi an lo zar treuh mai a, an khaw mipui ho nguai tak leh lungngai takin an lo thukun ngawih ngawih chu a va hmu a. Tichuan, thu a han zawt chiang a, an khaw daiah keipui lian tak mai hi a awm a, kar-1ah  bawng emaw, vawk emaw, kel emaw an ran an neih ang ang chu keipui chuan a dil thin a, tumah a that thei awm bawk silova. An khaw ran zawng zawng chu a ei zo tawh a, tichuan kar-1ah mihring-1 zel a dil leh a, an lal fapa a ei ni tur a nih vangin an lungngai a, puan senduk zarin an lungngaihna chu an lo ti lang a lo ni. Tichuan Mualsawmkuapakuavata chuan, “Enge inlungngaih ni! Keiman chu keipui chu a lu ka va la a nge!”, a ti a. Tichuan keipui awmna puk chu an kawhhmuh a, keipui puk chu a va pan hnai a, keipui chuan a puk atang alo hauhum khum a, a chheh vel zawng zawng chu lirnghing ang mai hian a nghing dur dur a. Mualsawmkuapakuavata chuan zam hauh lo chuan a luhkhung ta a, keipui chuan a rawn zuan a, keipui bengah a lo trham a leiah a paih thla tawp mai a, tichuan a chempui changel hnah tiat a lian chuan a lu chu a chhawk hmawk mai a ni. Keipui lu chu khua-ah a khai haw a, an khaw mipui leh lal chhungkua chu an lawm hle a ni. Tichuan, a tukah chuan ar an nei ang ang te chu an thawhkhawm a, hlim leh lawm takin ruai an siam a, sakei lu chu an ai ta a ni.

Mualsawmkuapakuavata chu khaw dang panin a kal leh ta a, khaw-1 a va thlen chuan puan dum an lo zar a, nu ho chu an lo trap luai liua mai a. Chinchang a han zawt chiang a, nu-1 chuan,”Kan khaw dai-ah khian rulpui lianpui mai a awm a, kar tin mihring-1 zel a ei thin a, vawin hi kan lal fanu a ei ni a ni . Kan lal fanu hi nula hmeltha tak leh hmeithai leh rethei khawngaih thei tak a ni a, tanpuingai te tanpuitu a ni a, kan chan mai tur hi kan ui a, kan lungngai a kan trap a ni”, a ti a. Tichuan Mualsawmkuapakuavata chuan,”Lungngai mahtache u, keiman rulpui chu ka va that a nge”, a ti a. Tichuan an khawdai rulpui kua chu a va pan ta a, rulpui chuan mihring rim leh thawm a hriat chuan a kua atang a rawn chhuak a,In ai a sang sangin a rawn ding ta ur ur mai a, a trihbaihawm thei ang berin a inhrosa a. Rulpui chuan a rawn chuk a, Mualsawmkuapakuavata chuan a nghawngah a lo man bet a, a lu chu a chhawk bung ta hmawk a, khaw lam pan chuan a khai haw ta a. An khaw lal leh mipui lawm lutuk chu an lam vut vut mai a, ran an nei ang ang te thawh khawm chuan ruai ropui takin an buatsaih a, hlim leh lamin ruai chu an kil ho ta a ni.

Tichuan Mualsawmkuapakuavata chuan, chu khua chu chhuahsanin khaw dang panin a kalchhuak leh ta. A kal zelna khua hi a pui deuh tual tual a, khaw lian ve tak pui ve takah a va thleng a. Kawt laiah chuan, puan dum te, puan senduk te, puan eng te, puan rawng chi hrang hrang mai chu an lo zar a, nu ho chu nguai tak mai hian an lo thu thrup mai a. Mualsawmkuapakuavata chuan, “Engtiziange in va nguai em em ve, puan te chu rawng hrang hrang inzar a, enge a awmzia?”, tihin an han zawt a, nu-1 chuan bul deuh hmuk hian,”Second-hand ka zuar a nih hi kan hralh thei lo a kan nguaih a nih hi, i duh leh thing la lei ve rawh!!”, a lo ti a, Mualsawmkuapakuavata chuan inthlahrung deuh chuan tumloh takin second-hand puan chu a thing a, pa-1 a lei sak a, an khaw lam pan chuan a haw ta a lawm.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in Thawnthu and tagged . Bookmark the permalink.

10 Responses to Mualsawmkuapakuavata

  1. denbawihi says:

    i ziak thiam bawka, chhiar a nuam hle mai. A tawp para ka thlenin ka tum loh ang deuhin a tawp deiha, ka nuih a za nasa…thiam tawp. hetiang thawnthu chhiar hi nuam ka tih zawng tak ani. lo ziak zel rawh aw..

    • zochepa says:

      Denbawih, ka thu ziak ho tak min lo chhiar sak a ka lawm e. Naupang thawnthu sawi tur an ngen sek che chuan tiang deuh hian han sawi la, ” Ngaaaa!”, a ti bai bai anga, sawi turin a tur nawn tawh lo mai ang che. 🙂

  2. chhangte_ll says:

    Second Hand a thinga..Lolzzz…

  3. Dula says:

    Chuan mualsawmkuapakawvata chuan khaw pakhat ava thleng leh a.A khua chu alo reh thiap mai a,A han zawh chian chuan a khaw tlangval leh thalai ho zawng zawng chu sava veh leh thangkam in ram lam ah an lo chhuak vek mai hi alo ni a…ti chuan mualsawmkuapakawvata chu……..

  4. Tualto pa says:

    I ziak ngaihnawm thiam hle mai…
    Hetiang khawpa thawnthu ngaihnawm ziak thiam chu intlansiaknaah te khan i tel lo nia…hahahahaha
    Thawnthu dang min phuahsak leh teh, ka lo chhiar leh ang e….tun chu Mualsangvata ni tawh se la,….lolz

  5. dultea says:

    Tehdaih chuan, i perh thla leh mial tawh lo maw, anihloh pawhin tui taka bawkbawnthur nen a siam dan te han ziah zawm teh

    • zochepa says:

      Dulte, ka blog-a comments 200na chiah hi tunge ni ang aw? ka ti a, hei i rawn comment a 200na chiah i ni e. I rawn lenglut a ka lawm e. I Vairam zin chu i la haw lo em ni?

  6. ngaiha says:

    chhiar anuam khawpmai mahse duh aiin a tawi deuh ka ti ka chhiar zo hma tlat mai, zawm dan tur a la awmlo maw?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s