Uama hmang tura inbuatsaih


Mahni pian leh seilenna ram ka chhuahsanna hi kum-6 a lo tling dawn der mai a. Hmanni chu groups mailah Nl Zopuiin leiletlo thlalak a rawn dah a, ka lung a ti leng hle a, he thu hi ziah ka chak ta tlat a ni. Kalay leh Kabaw-ah chuan tun ang hunah chuan, sumdawng mite’n Uama hmang hman turin tum engzat nge ka zin ang? tih an ngaituah a. Ar zuar hoin Masi leh kumthar a zawrh tur ar khawte fangin ar an khar a. Leiletpa ho lah Uama hmang hman loh hlauin nasa tak a tran lain buh an seng a. Thalaite pawh pocket-money tur tuakin buh zei, buh zah leh thil dang dang hna zawngin an buai laih laih thin a. Bazar thawmhnaw zuarte an lun hunlai tak a ni a, puanthui ho in daih lo hun lai tak a ni bawk. Puanthui lun deuh phei chu tlaivar deuhthaw ten puan an thui a. Uama hmang turin a tua te pawh mai, kan in buatsaih hlawm thin a. A bikin leiletlo nei ve kan ni vangin leiletlo ka hmu chuan ka nun hluite min thlir kir tir a, lung a va leng tak em.

Zoin photo

Naupangchhia kan nih lai kha chuan, buhban vui la hmin chiang lo, la dup deuh kha kan thliak a, buhchangper siam tur atan kan hawn thin a. In kan han thleng a nu leh pate’n thirbel saah min kan sak a, an han deng fai a, an thrap fai hmasa sa mai kha kan lo ei a, buhchangper hring nghal mai, rimtui ham ham, ban deuh chek chek han ei kha chuan, eng dang kha kan ngai bik lo. Buh zeina(ahna) hnuah ippui nen buhtro kan lo zawng ve a, kan hmuh tam chang te khan kan va han hlim ve thei teh reng e. Buhchangkuang kan thliak a, hamrik kan siam a, a kuang lian deuh, a te deuh te kha kan thliak a, akuang len leh tet a zir khan a ri kha a dang ve a. Ri hrang hrang kan duh vang khan buhchangkuang a len dan hrang hrang kha kan thliak a, a chang kiang kan han hmet  keh deuh a,  a hmawr tawn ve veah kan vuan a, kan han nawr a, akeh lai kha a rawn kul tliak  sak mai a, kan han ham chhin a,a rik that theih loh kha chuan, ” A kaw chhungah a ek a awm anih hi”,kan ti a, kan hawlh fai hnuah kan ham ri tliar tlair mai te kha va nuam thin tak em.

Photo by Zopuii

Hruih chil leh buh chil lai vel a bawngtawlailir khalh emaw chuan emaw te kha nuam kan ti em em a, a hun lai kha chuan motor kan ngai bik lo. Buhpawl a chen vel te kha thak sup sup khawp khan kan bingbilailet vel a, inbual mang lo khan ka mu thak leh sup sup thin a, tui tak chuan kan muhil ve thei zel a. Bial chhungah kan tei kual a, chaihte(sazu tetakte/chaichim awmvar chi) leh sephung/chep lai tur kan zawng kual a, chaihte kua han laih a, an hlet atang a an tlan chuak han um nak nak te kha nuam kan ti em em mai a, tunlai naupang games khel ho aimah khan kan hlimpui zawk awm e.

Photos by Zopuii

Kum-12 ka lo nih ve kha chuan, bawng enkawl leh eirawngbawl,tui chawi, thlai hnah/rah sih leh lawh kha kan ti ve thei tawh a. Kan lo hi Tuivar ral, Tlangzawl leh Vaphai khaw lu Hanta(Kawl khua) thlen hma si, tuivartlang hnuai a awm a ni a. Ka pain mual min liamsan tawh vangin ka ute hovin lei an let a, tun ang hunah hi chuan school chawlh a piangin lovah  a hmei apa a feh angai a. Kan lo hi Tahan atang Miles-3 vel  a hla a ni a, mi aiin tui kan hmu har thin vangin buh seng pawh kan tlai deuh thin a. Rultuha hi a tam em em mai a, buh zei leh hleih(Buhphal tel lianpui) tel vel te hian fimkhur a ngai hle a, rultuha hi hleih hnuaiah an lo awm duh khawp a. Vaukam zawhtefu kar a behlawi kan tuh ho kha enkawl ngai lovin an thang duang tha ve em em thin a. Tun ang hun hi chuan behlawi-rah paikawng khat khatin lawh tur a awm thin a. A upa lamin buh an zei laiin, behlaui-rah zawrh tur kan lo lo ve char char thin a. Duhkhawp ngah hnu kha chuan, bui kua te kan han lai thin a, bui kaw laih hi ka beidawng zingkhawp a, a kua hi a inzawm deuh vek vangin nileng pawh hian lai ila hlawhchham chang kha atam thei khawp a. A nuam kha kan ti ve hrim hrim a, thlansa phul kai khan kan lai leh ngei ngei thin a, tih fuh chang kha chuan kan man ve leh zauh zauh thin a.

December thla a chuan kai meuh chuan exam kan zo ve tawh a, lo a riah te kha nuam ka tizawk thin a. Hruih & buh chil hi nuam ka ti thei em em a, keimahin zinglam dar-1am thleng te bawngtawlailir chhawrin ka chil thin a. Hruih chil zawhah pawl buk ngei maiah han mut te kha nuam ka ti ve em em mai a. December-20 vel hi chuan lo nei tam zawk chu an pawltla fel vek tawh a, keini tuivar ral lam chu kan buai lai tak a ni thin a.Uama hmang hman loh hlau reng rengin tlaivar deuh thaw te khan buh kan chil a. 1988 kum meuh kha chu ka ute hoin theitawp an chhuah pawh khan December-24 tlaivar zan pawh khan kan buh kha kan la phur zo thei lo a. Mi naute chu thawmhnaw thar nen tlaivar turin an phu suai suai tawh a. Ka ute buh phur chhek-In a chhun luh tur nghakin Inah ka lo awm char char a. Ka nu lah chuan, ” I u a lo thlen chuan lir hi nangman lo-ah i khalh kir leh ang a, naktuk zingah i u-in buh a rawn phur haw ang a, nangin thlam i lo nghak anga, ruaitheh zawhah an rawn kir leh dawn ania”, a ti si a. Ka ute’, kumpui linglet a, rim tak a an hna thawh chu ka khawngai ve hle a, Masi hman ve ngei an chak a ni tih pawh ka hre reng a, mahse, Masi tlaivar leh thawmhnaw thar hak lawm rual tan chuan, ram a va awm daih chu a peihawm lo khawp a. Hreh deuh chung chun zanlai dar-12 ah chuan kan in a tang kan lo lam pan chuan ka in khalh chhuak a. Veng tin maiah chuan, T. Lalengzauva Masi hla hi an play re tluk tluk mai a, tlaivar thawm hlir mai hi bengah a cham a. Thanglui ka pelh meuh chuan a khawhar thlak leh zual a, mihring hmuh tur an awm tawh si lova, a thim ropui mai si a. Ka chhuah dawn khan ka nu hian min thlir liam vawng vawng mai a, min ngaituah ve hle tih ka hria a,a tul miau si vang a kal ka ni bawk si a. Varte leih ka pel chiah chu pa-1 hian,”Vala lo ding teh”, a rawn ti deuh chhur chhur a, “Chhawrtiang chauh ka keng si a, engtin nge aw ka tih ang?”, tih ka ngaituah buai ru ve hle a.”Tute nen nge in rawn kal, mi dang i hnungah an rawn kal em?”, min ti a, “Ka ute ho ka hnungah an rawn kal mek”, ka ti ve hmak a. “Tu nge i u?”, a ti leh a, min zuam ang tih ka hlauh vangin, “Kapmarama” ka ti a, heti hunlai a Tahan insual peih tak khaw dang ho pawn an hlauh em em chu Kapmarama (maram tih hi Tahan trawngkam a ni a, inti cowboy, pawisak nei lo tihna angvel a ni) a ni a. U Kapa hi ka u ti ve thei tho chu ka ni a, ka pa dam lai a kan lo lettu ber a ni a, a ruih em em lai pawn ka nu leh pa a hmuh chuan ngil tak a kal thin a ni a, kan unau pawh hi naute en a min en, min duat em em tu a ni. Kapmara ka tih takah chuan a zam deuh a, aw nem deuh chuan,” Khawngaihin hei ka thianpa hi a rui lutuk a, a kal thei tawh si lova, hetah a mut chuan a vawt si a, a thi mai ang. Vaphai khua kan ni a, kan khua thleng min thlah la cheng-100 ka pe ang che”, min ti a,”ka hmanhmawh naktuk Masi hman hman loh hlauin buh phur tura kal ka ni a, ka tlai khawmuang hman lo”, ka tih pawh khan trawng mawlh mawlh pah hian a thianpa leh a thirsakawr chu ka lirah a hlang kai a. Tlangzawl khua kan va thlen chuan kawng sirah meilum an lo ai a, tahchuan min din tir a, athianpa leh a thirsakawr chu a hlang thla ta a. pawisa chu min pek a tum a, a tullo ka tih pawh khan ka lir kha a dawm ding tlat a, a thianpa kekawr hnung ip a mi chu a rawn phawrh a, ka lirah chuan a rawn dah a. Ka kir leh a, kan lo lam kalna tur kawiah chuan ka kawi a. Varte pelh atang kawi a ngai a, tuivar lui kai a ngai bawk a, a thim mai bakah tlangsam buk leh lungkhawkrawk kha a tam ropui mai si a. Buk kar velah hian kawlkeite/uiral te hi an awm ve thin a, ka tawng fuh ang tih ka hlau ang reng khawp a.

Kan thlam ka thlen meuh chuan zinglam-2:30am vel ani tawh a, ka u nen chuan buh kan rut nghal a, lirah chuan tang-30(tin-60)  kan dah zo a, kan mu ta a. A tuk zingah ka u chu var hmain a tho leh a, lir chu a khalh haw a. Tukthuan tur chu kan thlam chung a zam mai-rah ho chu ka lo a,changkhate ka veh a, behlawi-rah ka lo a, ka siam mawlh mawlh a, chaw ka han ei chu, In lamah chuan arsa leh vawksa chhum pawlh an ei ngei dawn tih ka hre si a, ka lung a chhe ang reng khawp a. Tlailam Masi ruai threh hun a lo thleng a, Tlangzawl leh Vaphai khua lengkhawm thawm chu a na hle a. Loudspeaker,aluminuim tlangarh chi hman hun lai kha a ni a. An khuang ri leh an zai ri chu kan thlam lamah thliin a rawn beng vangin a ring hle a. Ruai an han theh tan dawn a,”Aurinna nen chuan naupang ho kha he lamah rawn kil ru, a chek hang tunge duh?, An ni ho kha sa an nei lo a nih kha, ete..etc..”, tih vel a an au thawm te chu ka tan chuan a thinrim thlak em em mai a. Ka rilru te te chuan, “An loudspeaker chu ka ban phakah awm se chuan ka vaw chhe vek ang mawle”, te ka ti vel thul. An au thawm chu min awhsik nihian ka hre ber a, ka thin hi a ur em em mai a. Ka mitthlaah chuan, “Kan kohhranah ka thiante ho chu hlui-2 kha an phah zawm ang a, ruai an kil ho leh laih laih ang a, a kawchhung te kha an han inchuh vel ang a”, tih chu a lo lang a, lung hi a awi thei mawlh lo.

Ril lah a lo tam ve tawk nen, Masi ruai theh ve theilo thin ur nen chuan ka u, lo kir tur pawh chu rei ka ti khawp a. Tlai-5.30pm velah a rawn thleng a ruai chaw leh sa min rawn ken a, keimahte chuan ka ei ve malh malh mai a, tram tawk bawk a, tui chu ka ti hle a ni. Chaw ka ei kham a, buh la awm chhun chu kan rut leh a, kan bungbel leh mutbu te chu lirah kan hlang a, kan haw ve ta a. Kawng lakah ka rilru a lian ber chu fai tak a inbual a, Masi thawmhnaw thar hak a, lenkhawmna lamah kal a, ar sawhchiar va siampui a, tih fel hnuah Zodi, Wentlight & Nguihninsi Video hall-ah a film tha ber tur a rinah video en ila, en zawhah tlaivarna lamah kal a, thiante nen sawhchiar vil a, a ei hunah a semtu leh a sengtu a tang kha ni ber mai a. Lungkham tur dang vak kha la awm hek lo, Vaphaipa ka phurna man kha cheng-10 hi a lo ni a, ka nu min pek nen chuan cheng-25 vel chu ka nei a, a hunlai chuan tam ve tak a ni a, rilru a hlim ve em em mai a ni. In ka han tleng chu buh kan rut sawk sawk a, kan hanin singsa fel a, ka inbual sawk sawk a, ka thlakhlelh em em, ka Masi thawmhnaw thar chu kan phawrh a, ka hlim dan kha sawiin a siak lo, thlam ka nghah lai a ka thinurna zawng zawngte chu khawnge an awm pawh hriat an ni tawh lova, len chhuah kha ka chak zek zek tawh mai a. Kan kohhran chu Masi zan hi naupang leh thalai a tlaivar peihte tan, nuho hian ar-5 te an thawh sa thin a,ICB mihlim kohhran tih takah, nu leh pa pawh lengkhawm tlaivar zak zak hi an tam thei khawp a. Mihlim ho zingah thlarau tla tha deuh chuan vawk te, bawng te ka thawh ang an ti a, Masi leh kumthar te hi kan hman zawm zak thin mai a, sa chu kan hnianghnar ve thei fu. Panlai hunte chu, hlim takin kan lo hmang thin a, upat hnu hi chuan lungkham tur leh ngaituah tur apui hi tam a, panlai hunte kha a va ngaiawm thin tak em.

Karhla lenrual duhte leh chhungte, tunang hunah hian in va ngaihawm thin tak em. Chung Pathian zarah Uama hmang tur a inbuatsaih mekte, in awmna hmun theuhah dam leh hriselin , hlim leh lawm takin inbuatsaihin; LAL pianchampha chu hlimin lo hmang tur che uin ka duhsakna ka hlan a che u.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in article. Bookmark the permalink.

14 Responses to Uama hmang tura inbuatsaih

  1. Amanda says:

    Chepate : Thu leh Hla lam hi i tui phian mai a,ei siam chauh emaw i thiam tih naklaiin,i thuziak a ngaihnawm in lung a tileng hle mai, Lalpian hun Champha lo thleng tur chu in khua atang chuan a ho leh viau dawn sia, thlasik Vur daifim tih hla chu lo sa ve hram dawn nia vawt ve lo mahse 🙂

    • zochepa says:

      Thiannu, tunlai chu i va reh em? I dam thin maw? Ka lehkha ziakte min hlut sak a vangin ka lawm e. Masi chu kan hnaih tual tual a, lung a leng tual tual zawng a ni hi.

  2. chhangte_ll says:

    A han han sei tehreng ve mawle. Leilet khian lung a tileng riau, mahse kan leilet neih na hmun ka hre lo..Lolzzzz…Ka til thenna lampang ani vak lo aniangf ..ha ha ha…

    Merry Christmas” le. Hla pakhat te mah ka la ngaithla miahlo, Christmas Tree chu siam ve teh ang, mahse chhuaktur awmin kan awm reng tawh si a, a buaithlak dawn mange 😦

    • zochepa says:

      Ka lunglengin ka ziak nghek a ni hi.

      Khawilamah nge in insawn leh dawn a?

    • chhangte_ll says:

      Itanagar ah min sawn dawn, ka kal chak tawh khawp mai 😀

    • zochepa says:

      Arunachal Pradesh a awm a ni em khah? Arunachal lam a ni chuan a nuam ngawt ang chu?

    • chhangte_ll says:

      Itanagar chu Arunachal Pradesh Capital ani. Aizawl a ruak lo tlata, mahse nuam ka ti leh viau tho ang – Awmna apiang ghi nuam ka ti zel a 😀

      • zochepa says:

        Awmna apiang nuam tih hi tha ber mai. Chantawka lungawi dan tha ber pawh niin ka hria. Khaw dang dang a awm khual pawh hi finna tam tak, mi nun leh zia hriat belhna tha tak a ni a, a tha a lawm. Upat tawh lamah Aizawl lamah hahdam takin ila awm a nga, nuam viau zawk ang chu, that lai hun chuan, hnam dang nun zirna hun i nei tihna an i mai a lawm, tawraw?

  3. dula says:

    a sei tha pek hle mai a..in khaw lam a krismas hman i chak tawh dawn mange aw…zopuii te ho nen ar han kang ngei bawk ula!

    • zochepa says:

      Sei tha khawp mai, khaw lamah Masi hman chu chak ve tawh tak ka ni. Tlaivarnaah chuan ar-sawhchiar hi a inhmeh berin ka hria.

  4. triplestar says:

    Sei viau nanga ka chhiarchhuak vek, ngainawmin lung a tileng hle mai. Leilet hi kan nei ve ngai lova mahse ka kal ve tawh, pic hokhi a nalh top. happy X-mass hman nuam le

  5. irenehnamte says:

    Hetiang ang hian thu i ziak ngaihnawm thiam hi ka lo ring lo a….heeeee….i va han thiam em em ve aw. Kei pawh naupan lai chuan Ka pa hoin leiletah kan riak thin. Exam zawh hi chuan min riah luh pui ziah. Lung len i kai tho hle mai a Masi pawh hnai lem lo mahse.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s