Eng mihring nge i nih?


1992 pawl-9 ka zir lai hian, kan leiletlo sawrkar-ah tihluihnain buh min chhun tir thin a. Ka pain mual min liam san hma avangin , ka pa aiawhin ka kal thin a. Burma sawrkar chuan lo 1-acre-ah hian buh tang-100(Tin-200) chhuak ngei ngei turin an chhut a, a lei a tha emaw a chhia emaw tui a hmu tha emaw thalo emaw, Tang-100 a chhuah pawn chhuah loh pawn 1-acre-ah buh tang-12.5(tin-25) hi chhun ngei ngei tur a ni a. Buh man hi a pawnah tang-1 Ks/-1,000 a nih laiin sawrkar chuan Ks/-250 lek ten min lei sak thin a. Heng leiletpa ho buh an leina tur hi sipai lal ho leh mipui zing mihosa ho inkawpin, mihosa ho hian sum an tum a, a hlep hi an in zahsem thin a ni. Buh phun hun lai vel hian, tihluihnain lo neimite an ko khawm a, buh chhun tur hi aman zat ve an pe a, hming an sign luih tir thin a, pawltlak hnuah buh chhun kim hunah a zatve hi an pe thin a, a chhung kim theilo chu lungIn/tanInah te an tan tir thin a ni. Mithenkhat phei chu an lo te pawh a laksak thin a ni.

Heng boruak vang hian leiletpa tan harsatna namen lovin an tawk thin a, lo thatna tur leichi leh thil dang lah sawrkar atang lei tur a awm mumal lova. Leiletpa ho tan a, leichi an zawrh tur ho lah a pawn lamah man to zawkin an zuar ru vek zel a, a pawnah mimal hoin to tak takin an zuar a, leiletpa ho thawhchuah atang lei ngam chi rual a ni thin lova. Ka pa dam laipawn khua a kheng a, kan lovah tui khung tur kanneih loh vangin buh seng tur kan nei lova, sawrkar a buh chhun tur chu kan chhung thei lo a, an sum min pek kha pek let lah an duh tawh silova. Ka pa chu thla-6 chhung lungin tang turin an man a, hnarum thawh chuan thla-3 chhung tan tur a ni a, ka pa pawh rawra chhuin thla-3 chhung a tang ve tawh a ni.

Kan lo hi Ngawn Pyn Khong Gyi bial a awm kan ni a. Min bialtu officer pa-1 hi Tahan a kan Mizo pui ngei mai a ni a. Buh chhun tur chungchangah min ko fo mai a, an Inah trum-2 lai ka kal tawh a, a hotu lam ho an rawn kal ngai meuh lova, an tiam hun bi diktakah ka thleng thin a. Darkar-2 chuang te ka nghak thin a school kal a ngaih vangin ka nghak chhuak zo lo a, ka haw san thin a. Trum-3na min ko leh a ka kal leh a, darkar-1 chuang ka nghah hnu chuan a hotu lam ho chu an rawn thleng ve trawk a. Tihluihna a hming min sign tir a, sum pek turte min pek hnu chuan haw mai ka tum a, sum min dil ta a lawm. Sawrkar danah khang sum dil kha a awm ngai lo tih ka hre chiang ve bawk nen, an mahni ka nghahnaah hun tam tak ka seng tawh nen, tihluihna a hming min sign tir bawk nen, ka thinin a tuar ta la va. “Hlawh neiin hna in thawk a, in tiam hunah in rawn thleng ngai lova, sum min dil hi ka pekna chhan tur che u a awm lo, ka pe thei lo che u”, ka ti a. In neitupa chuan, ” Eng mihring nge i nih a? midang zawng zawng pawn an pe a, i pek duh loh?”, tihin min vo va. ” A nih leh he sum hi sawrkar hriatpui a ni em? Receipt men pek dawn chuan ka pe ang che u”, ka ti a. A hotu lu lam ho chu pawisa chu pek ka tum a, receipt pek tur an neih loh vang leh min pek ngam loh vang chuan an la ngam ta lova. Ka Mizopui ngei mai chuan, “Engmihring nge i nih? chuti khati…”, ti chuan mi vo hrep mai a. Helaia, “Eng mihring nge i nih?”, min tih hi ka rilruah a cham reng a, heti hunlai hi chuan ,”Eng mihring nge i nih?”, min titu hi ka ngei rilru hle a ni. Sum chu pe lovin ka haw a, ka nu hnehah an lo dil leh tho va. Hemi kum hian kan bial a hnathawk ho zawng zawng chu a lu ber atang a hnuailam thlengin an thil tih dik tawk loh vangin an hna a tang an ban fai vek a ni.

Hun a liam zel a, a khat tawkin , “Eng mihring nge i nih?”, tih kha ka rilruah a rawn lang leh thin a. Ka hun kal tawhte k thlir leh a,”Eng mihring nge ka nih?”, tih chu ka in bih chiang thin a, ka thil tih tha lo te leh thil tangkailo te chu ka chhui let a, tih awm tur ka tih loh te chu kan thlir kir a, insiam that nan ka hmang phah thin a. Thil thalo leh thil trangkailo ka tihtur lak ata nasa takin min ven phah a. Ka nunkawng min siamtha tu a lo ni zawk hlauh a ni tih ka hmuh chhuah hnu chuan, “Eng mihring nge i nih?”,min titu chungah ka lawm hle zawk a ni.

Ka naupan lai a min hmusit a min trawngkhum thinte kha tawrh a har ka ti thin a. Mahse, khang min hmuhsitna trawngkam a vang khan zirna lamah, nunphungah nasa takin min hmusittute khum ngei tumin tumruhna min siam sak a. Minhmuhsitna trawngkamte chu ka tan malsawmna, minti hmasawntu a lo ni zawk a, tunhnuah hian an chungah ka lawm tak zet a ni. Inhmuhsitna hi khawvela ka thil huat berte zing a mi a ni a, mi hmuhsit hi ka nei hran lova, mi ngaisan em em pawh hi ka nei lem lo bawk. Ka ngaidan mawlte chuan, inhmuhsitna trawngkam hi ball mahni zawn a vawm ang hian ka ngai a. Kan ball vawm chu kan vawm nat poh leh a ting let chuan min perna ting dawn a ni tih hi ka hmuh ve dan a ni a. Ka naupan lai a min hmusit a mintrawngkhumtute pawh; kan lo puitlin hnu deuh chuan an trawngkam ting letin aperh nat vang nge ni dawn min be tha ngam mang lote pawh an awm a ni.

Awle Zofa lenrual duhte u, diknaah i trang ngam em? Hmusitna chu tharumin em ni i thungrulh dawn? Insiamthat nan i hmang ngai em? Eng mihring nge i nih? tih chu han inbih chiang teh le.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in article. Bookmark the permalink.

9 Responses to Eng mihring nge i nih?

  1. bhruaitea says:

    A ngaihnawm hle mai..1992 ah chuan sikul ka la lut lo :)Eng mihring nge kan nih hi keimahni kan in zawh fo hi a trul hle tak a sin.Thil thralo leh sual ni-a kan hriat te tih kan tum chang te hian Eng mihring nge ka nih,hetiang ti thei mihring hi ka nilo a sin ti-a mahni kan infiah hmasak thrin phawt chuan thil thralo tih kan hlat sawt zel dawn a lo ni..Thank you..

  2. chhangte_ll says:

    Tawngtlem hi finna ani e, mi a pawh a ngawih reng chuan a fing ani mai a.

    • zochepa says:

      Hotupa i sawi dik khawp mai. Kawl thufingah pawh,”Mifing an trawng tlem” tih a awm a lawm.

      Mahse, trawngtlem lutuk chu Mizo society-ah chuan ACHUT kan ti mai lawng maw? 😀

  3. Kawrdumbela says:

    A ngaihnawmin a bengvar thlak hle mai. Ngaihtuahna a tithui duh ngei mai.Mi ti ti atanga kan hriat hnute pawh nimahse nekchepna tuartute ngeiin in han sawi chuan mi deh dan adang zar mai.

    Tunlai hunah pawh khitiang tho khi a nih phei chuan …

    • zochepa says:

      Kawrdumbela, ka blog i lenglutin ka thu ziakte min hlut sak vangin ka lawm e.

      Tunlai hunah pawh nekchep ka la ni reng a, eng sakhua mah zalen takin kan awm thei tawh lo.Tin,sawrkarin tih luihnain kawng siam nan, leih siam nan, school sak nan,etc.. tih luihnain sum an khawn reng thin a, mipuiin sawrkar kan chawm a, sawrkar atang erawh beisei tur a awm lo thung.

  4. Dawldanga says:

    A ngaihnawm hle mai, i han sawi hmang atang khi chuan keini ve ai ngawt chuan i harsatna tawh te pawh a turu zawkin ka ring, mahse i tuar chhuak thei. Khitiang khi tawk ve ta ila; tih lam daih kei chuan ka lo inngaihtuah, lehkhazir hmangin phuba(????) ka la ang nge thil dangin tih te, engtin nge ka thungrulh ang tih te a ni. Inhnuaichhiahna/inhmuhsitna hi thil tawrh har tak a ni tih ka hre ve tawh a; zawldawh deuha i tuar chhuak thei hi i fakawm thlawt e

    • zochepa says:

      Burma sawrkar hian mipui min ti rethei lutuk hi chu kan thin hi a ur ngun a nia aw, tual ka that lo chauh a ni.

      • Dawldanga says:

        thinchhe deuh tan phei chuan in sum a harin a nia ka rin ni. hei hi a lawm keini kan vanneih zia te hi kan in chhut ngai lem lova. thlamuang taka kan awm man te hi tam deuh a ni.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s