Ka Nu Hmangaihna


Nute Ni 10th,May, 2009 chu a lo hnai leh tawh hle a. Khawvel pum-ah Nute Ni kan hman hun inang lo mahse, mi tam zawk hman ni chu a lo inherchhuak leh dawn ta. He ni-ah hian nu nei tawh lo tan zawng nunhlui ngai a, mittui tlakna ni a ni ngei ang. Pathian zarah Nu tih tur   ka la nei hi ka va vanneih tak em. Mi nu te angin; mifing leh miropui nilo mahse, kan unau tan chuan kan lei pathian kan rinchhan ber leh hmangaihna a min enkawlseiliantu a nih vangin, ka chhuang lo thei lo  a ni.

Ka nu hi Shan hnam-12 zing a Shan Gyi an tih (Shan common langauge a an  hmang chi) hi a ni a. Ka pi te lam hi Shan Saw Bua(Shan lal chi) an ni a. Buddhist sakhua vuan chhugkua a tang seilian a ni. Ka pi lungmawl vangin pawl-4 a pass a khawpui a school kal ngai chu ka piin a awih tlat lo a. Fa hniangber na na chu khaw dang a awm bo a awih lo va, “In lehkha zir te chu ngaihzawng lehkha thawn nan bak in hmang chuang lo, zir san vak vak a tul lo”, a tih vangin zirna run chu kai chak hle mahse kai thei lovin a awm a. Keini a fate erawh tihian min hrilh thin a, “Ka naupan laiin zirna hi chhunzawm chak hlemahse, ka nuin a phal loh vangin kham lo takin ka chawlh san a, nangni chu theitawpin tan la ula, ro pek tur engmah kan nei lo va, in zirna hi in ro chu a nimai. In zir theihna turin theihtawp tan kan la ang”, an ti thin a. A sur a sa, khawlum khawvawt karah pawh chawl lovin dawr a kai a, a rawn hawah kan thilzawrh tur siam leh kan ei tur siamin a mawng pawh hung hman lovin hun a lo hmang thin a. Inah lehkha kan han en te hian , hna thawh tur tam hle mahse, kan zir thiamloh a hlauh vangin kan thawh ai tur zawng zawng aman a thawk thin a. Zirna kan han titha ve deuh te hian keini aimahin a lawm zawk thin a, kan pass man te thawmhnaw thar min lei sak a, ar te min talh sak a, chhungkua hlim takin pass lawmin chaw kan ei ho za thin a, ka nu min hmangaihna leh min duhsakna kha a va ropui tak em.

Kan naupan lai a duhsakna leh hmangaihna vanga min lo enkawlna te kha, ka dawn kir thin a, kan tan a va hlu tak em! Pocket money te kha awlsam tak a mi pe mai lo khan, eng emaw tal min tih tir a; hlawh min siam sak thinte kha cheng/sum lak lut harsat zia leh, cheng hlutna min hriatthiam tirna hi ka va lawm tak em! Kan huan a pangpar leh thlai te, kan pocket money turah min zawrh tir te kha; cheng hlutna leh hna thawh hreh neih loh tur a, kaa sawi mai lovin, a taka min lo tih tir thin kha tunthleng hian ka va tang kai pui tak em! Ka nu zirna run atang a ka zir thiam eirawngbawl te hi khawi ramah pawh kal i la, a zahpuiawm loh zia leh mite ai hriatthiam awlsamna min pe thin te hi ka va lawm tak. Eirawngbawl rual ka nih hma pawh a, purun kheh/chan, thlaihnah sih/thian, thlai rah chan/vel,etc.. min lo zirtir te kha, mahni a chettlat & thiante nen awm hona-ah pawh, buina em em awm lo a, awlsam taka ka ti thei zel thinte hi mi fate ai a ka nihlawhna a ni. Mahse   eiin siam dan hi zirin hre tam hle mah ila, duhsakna leh hmangaihna a, ka nuin  chawhmeh a siam ai a tui ka la ei ngai meuh  lo, ka nu  chawhmeh siam ngei kha;eng tikah tak maw ka ei leh thei ang!

Kum-22 liam ta 19th, May, 1987  a ka pain mual min lian san hnu te khan, chhel takin min hmeithaipui a, kan zirna lamtluang khailak lo turin theihtawp chhuahin, khawngaihna leh hmangaihna a min enkawlna zozai hi rul sen a va ni lo teh lul em.! A chhungkhat unaute lah Shan state-ah an awm fai vek a, ka pa chhungte lah Mizoram-ah an awm fai vek a, chhungkhatlaina hnai awmlohna-ah nuchang tak leh chhel tak a, a fate pa-8 lai min enkawl puitling thei hi chu kan tan a va ropui tak em! Ka pa damlai a, an pa-2 a; inkhawm tur a an kal tlang thinte kha ka mit thlaah a lo lang leh thin a, ka pa awm tawh loh hnuah amaha a kal hnup hnup te kha, a chang chuan a lungchhe ve thin ani tih ka hria a,mahse nuchang takin a fate hriatah lungchhia leh mittui tla miah lo va, a awm thei te kha kan va tluklo tak  em! A bazaar haw ka va hmuak a, a thilphur ka chhawk te kha hote mah nise a lawm thiam em em a. Kan hnathawh chhuah ve ngei sum, a kut a kan hlan te kha a lawm em em mai a, zin chhuah chang a, thawmhnaw kan han hawn te khan a lawm em em a, kan chung a, a thil tih zozai leh thil min lei sak zozai te ngaituah chuan, keini tihsak ve chu ho hle mahse, a hmangaih a fate’n kan tihsakna-ah a lawm thiam a, kan dam chhungpawhin ka nu hmangaihna leh thil min tih sak te chu kan rul seng dawn si lo.

Buddhist sakua atang Kristian sakhua-ah a lo Pangthar ta a, Van Lal Pathian ngei mai hmu leh a pawm avang a a lawmna thar chu; ka hmangah Lallawmthara tih a lo phuah te hi kan tan a va ropui tak em. Rinna kawngah mi nu-te angin Pathian thu sawitlawrh duah thiam lo leh tawngtai a chhamphul duah thiamlo mahse, a taka a lo nunpui leh a tak a Pathian pawlna a chan te min hrilh thin te kha ka nun kawng hruaittu a va ni teh lul em! Manan harsatna a tawh apiang a, pindanah a lut a, Tawngtai-na a nei a; Bible a keu a, dinglam pang a Bible thu a chhiar a, thuthlukna leh innghahna tha Pathian thuah ngei a zawn thin dan te kha, kei pawh hian ka zir ve thin a, hlawkna ropui tak ka nei ve thin a; ka nu chungah ka  lawm  tak  zet a ni. Kan naupan lai a an khua a kan zin dan mi hrilh te , a rinna ngheh zia leh Pathian chu a awm chiang a, engkim tithei a nih zia min hriat tir thin. Rail chungah hmelhriat awm miah lonaah kan chuan lai a, a tawngtai-na Pathian-in a chhang a, kawng tluan a, Kross engin min hrua a tih te, an In kan thlen a, a ute hovin ramhui(Buddhist khua tam zawkah chuan khaw pawnah ramhuai In te an sak sak a, mikhual an neiin inthawina ei tur an hlan thin) hnenah inthawina hlan a ngai an tih pawn,”Pathian engkim tithei ka nei a tul lo”, tiin  a chhang a, reilote-ah a  khua a rawn sik a, a tlun a, ka pu-te hovin “Kha kha inthawi i duhloh vang anih kha”, an ti pawn, zamlovin, pindanah a va tawngtai a; vantirhkoh pa-2in a kiangah an awm pui  a, a khawsik pawh chawp lehchilh a dam ta te a sawi khan; Pathian awmzia leh ramhuite’n an ngam loh zia min hriat tir tak meuh a ni.  1988 Kawlram buai tur, a mangah Pathian-in  a hrilhlawkna leh pawl-7 ka nih lai a; Botany a graduate ka nih tur thu a hrilhlawk   te kha awihlo viau mah i la, a hun a lo thlen chuan a lo dik ngei mai si a. Pathian thilrel chu mihringte tihdanglam thei loh zia leh a thu tiam ang ngeiin a ti thin tih min hriat tir a, a tak a PATHIAN nen an inpawhna hi a fate thlengin ka nihlawh phah a ni.

Ka pa thih hnu a, ka pu-in (Ka nu u) an khaw lamah haw tur a; a rawn koh  a, kum-1 chhung meuh a thlem  pawh a, a haw duh lo te kha a fate min hmangaihna a va ropui tak em! Shan ramah khan a haw chuan kan unau mipa pa-4 zingah pa-2 chu hel sipai a tan a ngaih ngei ngei vang khan, mahni unuate kiangah pawh awm lovin, ka pu In leh lo pek pawh hnawlin min hmeithaipui te hi kan tan a va ropui tak em!

“Ka nu hian min thih san ta se”, tih ka ngaihtuah chang hian ka biangah mittui a lo luang thin a, ka nu damloh laiin Wesley Clinic-ah ka riahpui a, minutes-2 chhung vel a marphu a tawp a, biak theih tamiah lo chu, ka va han thlaphangin ka va mangang tak, kan tan vanpui a chim hi a ni ringawt mai. Pathian zarah a tha chhuak leh thei a, tunthlenga nungdam a la awm hi Pathian khawngaihna liau liau a ni. A taksa bawrhsawmin natna te ngah hle mahse, ka tan chuan a la hlu hle a ni. Kan ram harsat vang leh eibar zawnna vang a, kan ram ka chhuah san dawn te khan, ka kalbo san tur kha a lungngai hle tih ka hei lo, chhungkaw tan ka chhuah a ngai miau si a. Ka nu-in, “Pathian hnehah ka tawngtai a, Bible ka chhiar a, i kal chhuah hi Pathian-in rem a ti a ni, Pathian-in a hruai zel ang che”, min tih te kha ka tan thlamuanna ropui tak a ni. Damlo khum bet a a awm lai ten kan ram phone connection that lohvanga ka be pawh thei ta lo thin te kha a pawi ka ti a, min ngai ve ngei a ni tih ka hei si lo,a hrethiam lo ang tih ka hlau thin hle a ni.

A fapa hi tling lo hle mah i la, mi a chhuang ve thei thin em em a, a hmangaihna te chu rul seng lo mah ila, ka dam chhung hun hi a hming tichhe lo turin hun hman ka  tum zel ang. I fapa kawlvalenchhama awm hian ,Nu-te Ni lo thleng tur chu hlim leh lawm tak a hmang tur chein leh kan intawn leh hma chu dam leh hrisel a lo awm tur chein Pathian hneha tawngtai chungin ka duhsakna ka hlan a che.

Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in Mother's love, nu hmangaihna. Bookmark the permalink.

14 Responses to Ka Nu Hmangaihna

  1. bawmrang says:

    a ngaihnawm hle mai. nu ropui tak i nei a nih chu.nu fel tak i neih a vangin ka lawmpui che.
    kan naupan lai khan i nu suantam leh antam thur kha tui kan van ti thei tak.i u(nute zawk) kha nalh ka ti thei ltk bawk.hehe 😀
    I nu dawibur chanchin te kha hriat chian a va chak awm ve.

  2. bawmrang says:

    I blog a ka comment khi ka ring mai.

  3. dula says:

    ekhai!! ngaihnawm khawp mai.

  4. amanda says:

    Its very touching !! good post ~~~

  5. chhangte_ll says:

    Chepa, Chhungkhat laina hnaite zinga awm ngailo ve bawk ka ni – A ngaihnawm hle mai. Shan ho hi Thai anni mai ani lawmi ? Kawng lehlam takah chuan hmun hrang hranga laina neih hi a that ce na tak a awm.

  6. bawmrang says:

    Shan ho leh Thai ho unau an ti.burma a cheng Shan ho hi a hnam pui zawk an ti.
    amah chepa hian a hre chiang ang.han sawi teh se.

  7. zochepa says:

    @Bawmrang, Ku Dula, Amandatei, Ku Chhangte ka thu ziak tlawm tak min hlutpui a vangin ka lawm e.

    Shan(Tai), Thai & Lao hi unau an ni a, an tawng pawh hi an in hre pawh thei deuh vek. Thai ho hi Shan lal hmeinu fa a ni a, Shan ho hi lal nupui lian ber fa an ni. Thai ho hringtu nu hian a fate ro an chang theih loh ahlauh vangin; Shan thlahtu mipa unau-2 te hi, hekna tur ringawt a zawng a. A thil tihsual a man fuh a, a pa (Lal) hnenah a hek a, kut hnungkherhin an tawn a,an lal ram atang hnawh chhuah an ni a. CHuvangin, Shan mipa reng reng an kal hian kut hnungsuiha kal an ching e, an ti.

  8. dula says:

    sawi nuam lo pawh ani mai thei a..chepa i nu chu tunah khawnge a awm le aw?? i pa te khaw lam pawh hriat a chak awm hle mai…myanmar lam zofate harsatna hi hrethiam tur in ka hre tam lutuk lo hle mai tih te ka ngaihtuah..i thu ziak hi ka chhiar a..ka chhiar nawn leh a…!

    • zochepa says:

      Hotute’n in hriat chak miau chuan sawi loh ngam pawh a ni nang. 🙂 Ka nu chu tunah Tahan-ah a awm a, ka pa hi Mizoram Arro khua a piang, Mualpheng a seilian a ni a, a hming hi Rev. Liangkhaia phuah a ni.

  9. ALEXX fender says:

    Hetah hian a ni maw.. dula leh chepa chu in lo in-date vel a.. hehee

  10. irenehnamte says:

    I va ziak thiam em ve aw….chhiar nuam dap hle mai. Zo tawng ziah chu i thiam hle mai. Simple tawi hriatthiam nuam tawp.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s