MIZOTE HRIATTUR PAWIMAWH


Mizo-te hi ram dang khaw dangah pawh awm mah ila, a awm chhun chhunte insuihkhawm a, pawl, fellowship, association, union,etc… din a in hmuhkhawm hi nuam kan ti a. Kan tawng pawh hi kan ngainain hnam dang kan kiang a awm teuh karah pawh mi-2 lek kan nih pawn mahni tawng a inbiak ching tak kan ni a. Kohhran chihrang hrang kan awm angin kan rin dan(doctrine) pawh a in ang lo hle a, kan dan leh kan kalphung pawh a inanglo hle a ni. Kan awmna ram  a dang a, kan chenna khua leh tui a dang angin kan nunphung sukthlek dan, kan tawngkauchheh, kan ngaihdan, ka thil tih dan, kan duh zawng,etc.. te a dang avang hian a huho a kan awmhian buanna neuh neuh rilru inhmuhlohnate hi a awm duh a, chung tiang a kan buaina chu engte nge, engtin nge kan tih ang? tih hi ngaituah ho a ngai hle a ni.

1.KOHHRAN-AH

Kohhran-ah mithenkhat chu hotu ni chak tlat, upa nih chak tlat te hi kan awm a, politician te ang mai a vote zawng ruai ta teh pawh kan awm a. Hotu /upa kan nih duh vang a thil pek pe tawk tawk te kan awm a, mipui leh committee members te pawn  a neinung deuhte thu leh hla engamah hma a kan zah tlat leh an nihnain a tlinlohpui pawh a kan thlang mai thin hi, kan Christian-na leh kan hnam ti chhetu a niin ka hria. Pathian tihmi a ni em, hruaitu ni tlak a ni em, upa ni tlak a ni em? tih hi thlir thiam i la kohhran tan tha ngeitur hi thlang thin ila, kan hnam kan kohhran tan hian a va tha dawn em.

Mithenkhat chu sum duh vang leh lalna duh vangin  pawl/kohhran thar kan din a, ramthim nawr aiin kohhran dang a mi hmelhriat, unau , vuangva te mahni pawl a lutturin kan sawm a. Kohhran member pun deuh leh “Pathian malsawmna kan dawng” te kan la ti vel ve a, a sawmtu leh a sawmchhuahate hi Pathian an tih lawm phah hran in ka ring lo. Hetilo deuh zawng hian Pathian rawngbawl hi bawl i la ka sakhua kan hnam tan a that zawk ka ring.

Kohhran thenkhat chu kum-100 chuang a mi tawh Sap ho dan lo siam kha tunthleng kan la ring a, kan khawvel changkang danglam zel nen a inmilh tawhlo pawh “Kan dan pang ngai, kan kal phung pangngai tha kan la ti.” hi kan ti tuahhum a, thangtharte laka rawngbawlna leh thiltha tih tur thenkhat te a dal tlat zawk a, rawngbawlna hma a sawn loh phah nite hian ka hria. Kan kalpung leh dante hi tunlai khawvel milh a kan her danglam ve zil hi a tha inka hria.

Kohhran rawngbawlna tur leh kan tih tur hi kan hmu fuhlo deuh thin em ni aw? Kan kuanglo hi kan nawr nasa mah mah thin a, politic & khawtlangah thuchhuah, thil khap emawte hi kan lo nei ve sek hi a tul em em hran lo. Kan beramte kan ven hnehloh vang  leh kan zirtir that tawk loh vang a zu , drugs, thil dangte kan lo khap ve ringawt zel hi sualna a bul atang karphawng a peih tum lo va, a zar thlak ang lek fang ka ni a, reilovah a rawn chawrno leh thuai thin si a. Nasa zawk a inzirtirna hi uar ila, naupang zirtirna hi uluk hle i la, an zirlaibu te hi kumtin endikin Pathian thu mai bakah nun dan tha zirtirna te tel se, an puitlin hma ngei a piangthar turin inzirtir thei ngei ila, puitling chawlawl tawh inzirtir ai hian a hlawk zawk ngei ang. Mahni kohhran thurin theuh pawh hi an puitlin hma ngei hian zir thiam tir i la. Kohhranah rinhranna a vang a pawlchhuakte pawh an awm lo deuh ngei ang.

Rorel-naah kan duhdan leh ngaihdan aiin miten min hmu sikhaw ang tih hlauh vangin thiltha zawka kan ngaih pawh kan sawi chhuak ngam lo leh, kan thlang ngamlo thin hian kohhran leh khawthlang tam takin a ngawng phah thei a ni. Dik a kan hriat, tha a kan hriat hi chu tuma mitmei venglovin sawichhuak & tawmpui ngam i la a va tha dawn tak em.

2. KHAWTLANGAH

Khawtlangah tlawmngai pawl kan indin a, hmanlai ZAWLBUK hun lai a, thalaiten thu an neih ang leh mi chunga ro an rel ang a kal kan la tum tlat hi a fuh tawh lo. Kan ram kan hnam tan kan thawk emaw kan tih hi tihmingchhetu zawk a ni hlauh thei a ni. Hmanlai kha chuan Lal leh upa, thalaite & puithiam leh bawlpu te kha sawrkarna chelhtu leh mipuite chunga roreltu ber an ni a, tunah erawh kan chungah sawrkar dang a awm tawh a ni tih hi hriat tur. Sawrkar-in dan leh hrai, thawktu tur, timi bikte a nei thliah thliah a, an hna an thawh thatloh chuan sawrkar kan nawr mai tur zawk a ni a. An indaihlo pawn lakbelh turin kan nawr mai tur zawk a nia. Tlawmngai pawl kan nih angin mi chungah beisei letna hi nei miah lo i la, tanpui ngai tanpui leh vangtlang hnate hi tlawmngai tak a thawk zawk ila. Tlawmngai pawl atang enge maw beisei neih vanga hotu nih tum phet te hi kan hnam ti chhanghchetu a ni a, members te pawn thlan dan kan thiam a ngai hle a ni.

3. MIZO CHRISTIAN FELLOWSHIP, UNION & ASSOCIATION-AH

Mizote hi ram dang dang khaw dang dang a pem, hnathawk & zirlai kan kat ve ta nuk a, kan kalna/awmna apiangah fellowship, union, association,etc.. kan din deuh fur a. Mahni kohhran thunrin ang a Pathian thu sawi ching tlat te hi kan la awm a, kohhran hrang hrang fellowship ang a kan din chuan kan thurin hi sawi vak vak a chilo va, kan thurinte hi inkalh a tam a, kan pawlpuite tan ngaihthlak a nuam laiin thenkhat tan ner naw naw-na tham a lo ni duh a, inhnialna pawh namenlovin a chhuak thei tih hi hriat a tha. Zavai pawmtlan theih tur Pathian thu hi sawi tur a tam; chung chu sawi hram hram ila kan hlawkpui zawk ngei ang. Rorel nikhuaah pawh mahni kohhran kalphung leh dan ringawt tih lal phet tum lo ila, atha zawk leh kan pawm tlan theitur zawk hi dap hram zawk ila hmasawnna a ni ngei ang.

Union, association,etc.. ang chiah pawh mahni khaw tihdan nihloh vanga tawmpuiloh bur ang chite, mahni khaw dan tih lal tum tlatte hi a finthlak ber lo a, kan khaw tih dan leh kan lo inkaihhruai dan tha a kan ngai a nih paw’n thil kalhmang leh athatna te chu thiam taka mite rilrem zawng a kan sawi hi a pawimawh hle a ni.

A chung ami ang chi zawng zawngah hian hotu/hruaitu inthlan nikhua hian mah ni CHI tete, khua tete a loin teltual a, atha emaw tha lo emaw mahni CHI ,KHUA & THIAN te choh thlan/vote tum tlatte hi hnam hmasawnna leh lungrualna daltu lian tak a ni. Kan zinga mi tupawh a tha leh fel chu kan thlang /vote mai tur zawk a ni.

4.INTERNET KHAWVEL-AH

Internet hi Mizote’n kan hmelhriatna la reilo hle mahse kan hmang tangkaiin hma kan sawn chak hlein ka hria. Mahni awmna theuha kan thiltih hi khawvel hriat, mite hriatah pawi kan ti dawn nge? Rawn tarlang se kan haw dawn em? tih hi kan nitin nunah in en a tha, awlsam takin kan thil hmuh leh hriat a ni la lain khawvel hriatah puanzar theih tawh avangin kan hnam tihmelhemtu kan ni hlauh dah ange.

Websites,forum,blogs ,chat rooms & groupsmail ang chi-ah te ukchhuak lutuk a thu ziah te, dawta mi puh te, thu belhchian dawlloh ziah te, inhmuhsitna tawngkam mawilo ziah te, hmanlai thil kal tawh sawichhuah tlakloh sawi chhuah te, kan chhiatna leh chetchhiatna in sawi tawn  ang chi te hi; a ziaktu kan nihna kan in tar lang lek a nih mai bakah inpumkhatna leh inunauna ti chhe thei a nih vangin chin tam loh a tha. Kan thu ziah turte kan ziah hmain belchiang ila, mi tan a pawi em? kan hnam inpumkhatna a khawih pawi thei em? tih hi uluk takin ngaihtuah thin ila,he internet hi inpawhtawnna tha zawk, thu inhriattirna tha zawk atan hman ngei i tum ang u.

5.EIBAR ZAWNNA-AH

Mizote hi eibar- zawnna kawngah hian kan la hnufual em em a, hnathawh tur thar dapchhuaka , taima leh chhel tak a thluak hmang a thawk te erawh an dingchhuak deuh zel a. Mitam zawk erawh miin sumdawn or hna-1 an hlawkpui chuan kan uar ve hlut a, mi tlemte tan a eizawnna tlak tur kha, mipui mimirin kan tih ve hlut tak a vangin tutan mah eizawnna tlak lohah kan chhuah leh thin hi; a pawi tak zet a ni. Mi eizawnna kut thiam, thil thiam harsa takin hun  & cheng tam tak a an zirte hi awlsamte a, a thlawn a thiam kan lo tum ve phet te hi mi mawl muk leh midepde awm dan a ni a, kan sim vat a tha. Awlsam tak a cheng laklut chu kan hlut vak lo angin kan hmang zo hma a, chutiang ang chuan thiamthil awlsam taka kan thiam ho pawh kan hlut lo va, intihtheih nan mi hnen a sawi mai mai, hrilh mai mai a awl a, chhungkaw-1 tan a eizawnna tlak an thiam thil chu; mi tam takin an lo hriat ve chuan eizawnna tlak lohah  a chhuak deih thei a ni tih hi hriat a tha.

Kan enzawnna kan hna hi kan tihdan pangngai ringawt kan hmang a, hmasawn a, tihchangtlung a, a awlsam dan , a that zawk leh a hlawk zawkna tur hi ngaihtuah kan tum lem hlei lo va, kan tih dan ngai ngai hi kan hmang tlut tlut a, hma kan sawn tur angin kan sawn thei lo va, kan intodelh loh phah thin niin a lang.

Mi tihdan zir ngawt lovin mahniin kawng thar eizawnna thar kan dap a, chik tak leh uluk tak a, kan rilru zawng zawng kan sen a kan zir chian hi a ngai tak meuh meuh a ni.

6. LAWMTHU SAWI & HRIATTIRNA KAWNGAH
Mizote hi mipui pungkhawmnaah chuan, tlawrh duah a lawmthu sawi hi kan uarin kan thiam viau a, mimal nunah erawh lawmthu sawi nachang hrelo hi kan la tam hleiin ka hria. Miin minpuih a, kan thil an chhar a min pe let le a, kan hriat duh kan zawt a min hrilh a, mi In-ah kan cheng a, mi In-ah chaw kan ei a,etc.. “Ka lawm e.’ tih nachang hrelo hi hriat tur an va la tam tak em. Mi chungah beiseina kan nei run a , kan beisei ang a min tanpui loh chuan lawm a hnekin ka la vuiin kan la sawisel zui thin hi chu tanpui tlak pawh kan ni lo.

Ram dang khaw dang atang thil kan inthawn a, duham takin kan ken tir a, a sen so leh lawmthu sawi lamah kan inren leh fu bawk si. Ram dang khaw dangah thil tlawmngaiin kan in zawrh tir a, a man(sum/cheng) kan thawn  a, kan dawn tawh chuan hriat tir leh lawmthu ka sawi ta nge tih awm tawh lo a, kan ngawihbo pui mai mai ang chi te hi; a hnuleh lehpek awmturah chuan mi tuin nge tlawmngai a lo pui peih tawh ang? Chhungte, thiante, pawlho, kohhranah cheng/tanpuina ang chi ram dang khaw dang a tang nei ang tawk tawk an han thawn ve tang tang a, lawm thu sawi lo mahse, an thawntuin a thleng nge thlenglo tih rilru hahin, a lo ngaituah ve nauh nauh thin ang tih hi hriat thiampui a, inhriat tir hram hram hi thil tha a ni a, a thawntu tan pawh lehpek awm se, a phurawm deuh ngei ang.

7. MI TIH DAN ZIR KAWNGAH

Mizote hi kan mi ngaihsan zawngte tih dan chu uar taka zir hlut mi kan ni a, kan uar laileng lah a ram pum, a hnam pum a zir leh uar hlut mi kan niin ka hria. A bik takin Sap ho hi kan ngai sang a, an incheidan, an nun dan atha lo lai lai zir hi kan ching a, an taimakna te, hun an vawng dikna te, an chhelna te, an rilru zauna te hi kan zir leh mang si lo va. Hnam dang kan hmusit zawng laileng lah hi kan tluk miahloh pawh eng ngamah hmain kan han hmusit ve ringawt zel a. Eng hnam pawh nise, an thil tih dan tha leh entawn tlak hi chu zirin entawn ve zung zung zawk ila. Incheina lam leh nundan hi chu, kan Mizo culture incheina & nun dante hi; hnam dangin min entawn zawk rawhse tih rilru hi pu zawk i la. Inchei dan, lu meh dan ang chi te hi a ram pum leh a hnam pum a uar bik leh inang thum lo va, mahni style hran nei a, creative deuh a kan incheina leh lumeh dante hi kan ngaituah a hun ve tawh lo maw? Mizo inchei dan & Mizo sam style tiha khawvel thangchhuak tur khawp hian tan ila teh ang u.

Khawvel-ah Mizote min an lo hriat deuh deuh a, “Mizo” tih  chuan an rilru/ mitthlaah mi tlawmngai, mi rilru tha, mi taima, mi rinawm, mi intodelh an ni tih hi; a lo lan theih nan tan ila teh ang u.


Advertisements

About zochepa

Tahan a piang leh seilian ka ni a, fiamthu duh tak leh thian ngaina tak mi ka ni. Sports lam hi a en nuam ka ti deuh vek a,football, intlan siak, inzuan siak, martial arts & chess khel hi nuam ka ti zual bik.
This entry was posted in article, Culture. Bookmark the permalink.

8 Responses to MIZOTE HRIATTUR PAWIMAWH

  1. Kima says:

    i blog hi misual.com side bar link ah ka lo link ve thei em?

  2. luliana says:

    Chepa : i thu ziak hi a that ka ring, naktukah ka rawn chhiar ang uluk zawkin…inkhel en a hun tlat 🙂

  3. chhangte_ll says:

    Kohhran/Khawtlâng?Politiks inkungkaih tlat hi chu a ninawm lam deuh ani e.Mahse kan thlântlin te anni miau si !!

  4. amanda says:

    Chepa: I ziak tha khawp mai, i rilru hi a creative tlat, @lulian ngun takin i lo chhiarchuak dap dawn nia, i hlawkpui khawp ang 🙂

  5. zochepa says:

    @luliana, i rawn lenglut a ka lawm e.
    @chhangte, ni e tawraw.
    @amanda, ka lawm e.

  6. Henry Vangchhia says:

    Ka nau chu, i ngaihtuahna a puitling hle mai. Ka chhuang khawp mai che. Keep it up.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s